Naxçıvan Qarnizonu tam orta məktəbində Zərifə Əliyevanın 100 illiyi ilə əlaqədar tədbir keçirilib - FOTOLAR
Naxçıvan Qarnizonu tam orta məktəbində görkəmli oftalmoloq-alim, akademik Zərifə xanım Əliyevanın anadan olmasının 100 illiyi ilə əlaqədar tədbir keçirilib.
Əlahiddə Ümumqoşun Ordunun mətbuat xidmətindən NUHÇIXAN İnformasiya Agentliyinə verilən məlumata görə, tədbirdə əvvəlcə Azərbaycan Respublikasının ərazi bütövlüyü uğrunda həlak olmuş şəhidlərin, Ümummilli Lider Heydər Əliyevin və akademik Zərifə Əliyevanın xatirəsi yad edilib, Dövlət Himnimiz səsləndirilib.
Naxçıvan Qarnizonu tam orta məktəbinin direktoru, Azərbaycan Respublikasının Əməkdar müəllimi Natiq Əhmədov və digər çıxış edənlər Zərifə xanım Əliyevanın həyatı və tibb elminə bəxş etdiyi əvəzsiz xidmətlərindən danışıblar. Bildirilib ki, akademik Zərifə Əliyeva zəngin mənəviyyata sahib əsl ziyalı kimi mənalı ömür yolu keçib, əhatəli elmi fəaliyyəti ilə ölkəmizdə tibb sahəsinin, xüsusilə oftalmologiyanın inkişafına əhəmiyyətli töhfələr verib.
Tədbirin bədii hissəsində görkəmli alimin şərəfli həyat yolundan, elmi nailiyyətlərindən, ictimai xadim kimi əvəzsiz fəaliyyətlərindən bəhs edən videoçarx nümayiş olunub. Sonda şagirdlər Zərifə xanım Əliyevaya həsr olunan şeirləri bədii qiraət edib və musiqi nömrələri ilə çıxış ediblər.