AMEA-nın müxbir üzvü Hacı Qadir Qədirzadənin 75 illiyi qeyd edilib - FOTOLAR
AMEA Naxçıvan Bölməsində Azərbaycan etnoqrafiya elminin görkəmli nümayəndəsi, AMEA-nın müxbir üzvü Hacı Qadir Qədirzadənin 75 illiyi qeyd edilib.
NUHÇIXAN İnformasiya Agentliyi xəbər verir ki, AMEA Naxçıvan Bölməsində keçirilən tədbirdə bölmənin sədri, akademik İsmayıl Hacıyev alimin həyat və yaradıcılığından söz açıb. Bildirib ki, Hacı Qadir Qədirzadə 1975-2018-ci illərdə AMEA Naxçıvan bölməsində müxtəlif vəzifələrdə çalışaraq Azərbaycan elminə bir-birindən dəyərli töhfələr verib. Dünyanın bir çox ölkələrində müxtəlif səviyyəli beynəlxalq simpozium, konfrans və tədbirlərdə iştirak edib. 400-ə yaxın elmi, elmi-kütləvi məqalə və 20 kitabın müəllifi olan Hacı Qadir Qədirzadə tədqiqatlarında qədim diyarımız Naxçıvanın tarixi və etnoqrafiyasına əsas yer verib. Hacı Qadir Qədirzadə “Əshabi-Kəhf: müqəddəslik, tarixilik, inamların genezisi”, “Ailə və məişətlə bağlı adətlər, inamlar, etnogenetik əlaqələr”, “Tanrı hüzuruna gedən yol”, “Həzrəti-İnsan”, “Cəhriçay vadisi”, “Nuh peyğəmbər, Dünya tufanı və Naxçıvan” və digər kitablatın müəllifidir.
Tədbirdə Bölmənin Tarix, Etnoqrafiya və Arxeologiya İnstitutunun şöbə müdiri, tarix üzrə fəlsəfə doktoru, dosent Asəf Orucov və həmin institutun böyük elmi işçisi, tarix üzrə fəlsəfə doktoru Aytəkin Qəhrəmanova Hacı Qadir Qədirzadə ilə bağlı fikirlərini bildirib, onun insani və ziyalılıq keyfiyyətlərindən danışıblar.
Vurğulanıb ki, Hacı Qadir Qədirzadə təkcə mühüm tədqiqat və elmi işləri ilə deyil, həm də yetirmələri olan yüzlərlə gənc alim və ziyalıların müəllimi kimi yaddaşlarda yaşayır.
Bölmənin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Hacı Fəxrəddin Səfərli və digər çıxış edənlər alimin tədqiqatları haqqında dolğun məlumat verib, xatirələrini bölüşüblər.
Hacı Qadir Qədirzadənin ailə üzvləri adından çıxış edən İqrar Əliyev alimin 75 illik yubileyinin keçirilməsinə görə minnətdarlıq edib.
Adilə Səfərova