Naxçıvan Dövlət Universiteti müəllimləri IBM üzrə “SkillsBuild for Academia” proqramına qoşulublar

NUHÇIXAN xəbər verir ki, Naxçıvan Dövlət Universiteti ilə IBM arasında imzalanan əməkdaşlıq müqaviləsinə əsasən bu sahə üzrə seçilən müəllimlər “SkillsBuild for Academia” proqramına qoşulublar. Proqrama hazırlığın vəziyyətinə dair ali təhsil ocağında görüş keçirilib.

Universitetin rektoru Elbrus İsayev  müəllimlərin bu istiqamətdə qoşulacağı təlimlərin əhəmiyyətini diqqətə çatdırıb. Qeyd edib ki, bu istiqamətdə həyata keçirilən təlim və tədris proqramları  texnologiya sahəsində  tələbələrin və tədqiqatçıların hazırlığına təkan verir.  Rektor IBM üzrə seçilən müəllimlərin gələcəkdə ali təhsil ocağında qurulacaq Texnoparkın fəaliyyətinə mühüm töhvələr verəcəyini diqqətə çatdırıb.

Görüşdə qeyd edilib ki, bu kurs çərçivəsində ilkin olaraq 20 professor-müəllim heyətinin iştirakı nəzərə alınaraq 5 modul üzrə Cloud Business (Bulud biznesi), Enterprise Design Thinking (Dizayn düşüncəsi), Artificial Intelligence (Süni intellekt), Cybersecurity (Kiber təhlükəsizlik), Data Science (Data elmi ) təlimlər həyata keçiriləcək. Eyni zamanda bu proqrama tədris materialları və TTT(train the trainer) kursları da daxildir.

Diqqətə çatdırılıb ki, artıq oktyabrda baş tutacaq “Cloud Business” təlimi üçün  3 müəllim “IBM  Skills Network”  platformasından qeydiyyatdan keçərək təlimlərə cəlb olunub.

Qeyd edək ki, IBM dünya çapında informasiya texnologiyaları və xidmətlər sahəsində liderdir. Bu əməkdaşlıqların məqsədi, texnologiya sahəsində peşəkar kadrlar yetişdirmək və müstəqil tədqiqat və inkişafı dəstəkləməkdir.

Səadət Əliyeva

NDU-nun Televiziya, mətbuat və ictimaiyyətlə əlaqələr bölməsinin müdiri