Hacettepe Universitetinin rektoru NDU-da olub - VİDEO
NUHÇIXAN xəbər verir ki, Türkiyənin Hacettepe Universitetinin rektoru Mehmet Cahit Güranın rəhbərlik etdiyi nümayəndə heyəti Naxçıvan Dövlət Universitetində olub.
Görüşdə Naxçıvan Dövlət Universitetinin rektoru Elbrus İsayev ali təhsil müəssisəsinin tədris, elmi fəaliyyəti, beynəlxalq əlaqələri ilə bağlı məlumat verib. Rektor Naxçıvanda peşəkar tibbi kadrların hazırlanmasında Türkiyənin ali təhsil ocaqlarının böyük dəstəyi olduğunu dilə gətirərək bildirib ki, hər il yüzlərlə tələbə qardaş ölkənin universitetlərinin xəstəxanalarında rotasiya və stajkeçmədə iştirak ediblər. Məzunlardan bir qismi Avropa və Türkiyənin müxtəlif xəstəxanalarında hazırda həkim kimi fəaliyyət göstərirlər. Rektor bu dəstəyə görə türkiyəli həmkarlarına minnətdarlıq edib.
Hacettepe Universitetin rektoru Mehmet Cahit Güran Naxçıvan Dövlət Universiteti ilə əməkdaşlığın hər iki universitetə fayda verəcəyini bildirib. O, rəhbərlik etdiyi ali təhsil müəssisəsinin Türkiyənin ən nüfuzlu universitetlərindən biri olduğunu, burada 3 min 700-dən çox akademik heyətin çalışdığını və 53 mindən çox tələbənin təhsil aldığını diqqətə çatdırıb.
Görüşdə tibbi kadr hazırlığına dəstək perspektivləri müzakirə olunub, növbəti semestrdən etibarən akademik və tələbə mobilliyi proqramlarında, tədris materiallarının təmin olunmasında Hacettepe Universitetinin hər cür dəstəyə hazır olduğunu bildirib. Xüsusilə növbəti tədris ilindən etibarən Naxçıvanda fəaliyyətə başlayacaq Tibb bacısı işi ixtisası üzrə müəllim kadrların təmin olunması və NDU tələbələrinin Hacettepe kitabxanasından faydalanmaq imkanları barədə razılığa gəlinib.
Naxçıvan Dövlət Universitetində tədrisi ingilis dilində aparılan Tibb ixtisasında Hacettepe akademik heyətinin və xəstəxana təcrübəsindən istifadə barədə imkanlar da müzakirə edilib.
Görüş zamanı Naxçıvan Dövlət Universitetinin Tibb Kollecinin də bu imkanlardan maksimum faydalana biləcəyi vurğulanıb, bir sıra tibb texniki ixtisaslarda təhsil alan tələbələrin Haccetepe Universitetində təcrübələrinin təşkilinə razılıq əldə edilib.
Azərbaycan Respublikasının Türkiyə Respublikasındakı Səfirliyinin təhsil müşaviri Nəcibə Nəsibovanın iştirak etdiyi görüşün sonunda qarşılıqlı hədiyyələr təqdim edilib, xatirə fotosu çəkilib.
Səadət Əliyeva