Dünyada ən böyük uçan quşun nəsli kəsilə bilər

Rusiya Elmlər Akademiyasının alimlərinin məlumatına əsasən, son onilliklər ərzində dovdaq populyasiyasının sayı beş-altı dəfə azalıb. Bu, çöllərdə yaşayan dünyanın ən böyük uçan quşudur. Dovdaqlar çox ehtiyatlıdır və dünyaya gəldikləri məkana çox bağlıdır. Onlar əkinə zərər vermir, eyni zamanda alaq otu, xırda gəmiriciləri və həşəratları məhv edirlər.

NUHÇIXAN Rusiya KİV-lərinə istinadla xəbər verir ki, ötən əsrin sonunda Volqa bölgəsində 8-10 minə yaxın dovdaq yaşayıb. Volqada quşların populyasiyası İspaniyadan sonra dünyada ikinci ən böyük populyasiya hesab olunub. 2010-cu illərin əvvəlindən nadir quşların sayı kəskin şəkildə azalıb, çünki fermerlər və kənd təsərrüfatı müəssisələri bütün yataqları şumlayıb, sahələri emal etməyə və böyük həcmdə kimyəvi maddələrdən istifadə etməyə başlayıb. Həşəratlar, alaq otu və digər ziyanvericilər məhv edilib, nəticədə dovdaqlar yemsiz qalıb.

Son bir neçə ildə Volqa regionunda dovdaqların sayı iki, ayrı-ayrı ərazilərdə isə beş-altı dəfə azalıb. Hazırda qeyd olunan ərazilərdə dovdaq və Qırmızı Kitaba daxil edilən digər quşların qorunub saxlanması üçün Saratov təbiət qoruğu yaradılıb. Təbiət qoruğu onları brakonyerlərdən qorumağa kömək edir. Lakin indi dovdaqlar üçün əsas təhlükə xüsusi olaraq qorunan təbii ərazidə tənzimlənməyən kənd təsərrüfatı işləridir.

Azərbaycanda bu quş Qızılağac və Türyançay dövlət təbii qoruqlarında, Şirvan, Ağ göl, Şahdağ milli parklarında mühafizə olunur. Dovdaq Beynəlxalq Təbiəti Mühafizə İttifaqının Qırmızı Siyahısına, Azərbaycan (1989-cu il) və Naxçıvan Muxtar Respublikasının (2006-cı il) Qırmızı kitablarına, СIТЕS, Bern və Bonn konvensiyalarına daxil edilib.