Tanınmış güləş mütəxəssisləri Naxçıvanda seminar keçib - FOTOLAR

NUHÇIXAN xəbər verir ki, Azərbaycan Güləş Federasiyası (AGF) məşqçilər üçün təşkil etdiyi ümumrespublika seminarına Naxçıvan şəhərində start verib. Naxçıvan Muxtar Respublikası Gənclər və İdman Nazirliyinin dəstəyi, AGF və Naxçıvan güləş Federasiyasının birgə təşkilatçılığı ilə keçirilən seminarın nəzəri hissəsi nazirlikdə, praktiki mərhələ isə Naxçıvan Şəhər Uşaq-Gənclər İdman Məktəbində reallaşıb.

Azərbaycan Güləş Federasiyası Hakimlər Kollegiyasının sədri Qərib Əliyev, sərbəst güləş üzrə U-17 milli komandanın böyük məşqçisi Əsgərxan Novruzov və I-S beynəlxalq dərəcəli hakim Sədi Quliyev tərəfindən keçilən seminarda mütəxəssislər öz təcrübələrini məşqçilərlə bölüşüb, məşqlərin keçirilməsi, güləş qaydalarının ətraflı izahı və s. mövzularda geniş məlumat veriblər. Seminarda muxtar respublikada fəaliyyət göstərən 28 güləş məşqçisi və 50-dən çox idmançı iştirak edib. 

Ümumrespublika seminarının məqsədi ölkənin müxtəlif bölgələrinin idman məktəblərində, cəmiyyət və təşkilatlarda işləyən güləş məşqçilərinin bilik və bacarığını daha da təkmilləşdirməkdir.

Əlavə edək ki, gənclər və idman naziri səlahiyyətlərinin icraçısı, nazir müavini Məcid Seyidovla AGF nümayəndə heyəti arasında görüş keçirilib, Naxçıvanda güləşin inkişafı, əməkdaşlıq əlaqələrinin gücləndirilməsi və gələcək perspektivlərlə bağlı müzakirələr aparılıb.