Üçqat dünya çempionu Hacı Əliyev: Tam forma yığmağıma çox az qalıb

138

Bu il bir çox idman növlərində olduğu kimi, güləşdə də Tokio Olimpiadası üçün lisenziya mübarizəsinə start veriləcək. İlk belə yarış sentyabrda Astanada keçiriləcək dünya çempionatı olacaq. Onadək isə pəhləvanlarımızı apreldə Buxarestdə baş tutacaq Avropa çempionatı və iyunda Minskdə təşkil olunacaq ikinci Avropa Oyunları gözləyir. Hər zaman olduğu kimi, bu yarışlarda da güləşçilərimizdən uğurlu çıxış gözlənilir.

NUHÇIXAN xəbər verir ki, belə idmançılardan biri də üçqat dünya çempionu Hacı Əliyevdir. Sərbəst güləşçimiz əvvəlki kimi qələbəyə iddialıdır. İyirmi yeddi yaşlı güləşçi son durumu və yanvarda Hindistanda keçirilən klub yarışı haqqında bunları deyib: “Ötən ilin sentyabrında Belarusda keçirilən yarışda dizimdən zədələndikdən sonra bir aya yaxın məşq etmədim. Ona görə də dünya çempionatında uğursuzluqla üzləşdim. Artıq ağrılarım yoxdur, zədəm tam sağalıb. Ancaq hələ optimal formada deyiləm. Hindistanda keçirilən turnirdə pis çıxış etmədim. Tam forma yığmağıma çox az qalıb. Hindistanda çıxış etdiyim komanda dördüncü oldu. Yeni ilə uğurlu start üçün həmin yarış mənə çox vacib idi. Yalnız son dünya çempionatının finalçısı Bayranq Puniaya uduzdum. Dünya çempionatından sonra heç bir yarışda iştirak etməmişdim. Uzun müddət heç məşq də etməmişdim. Zədəmi aradan qaldırdıqdan sonra Pro Wrestling Liqaya qatıldım. Bu üzdən Puniayla görüşdə də formada deyildim. Hərçənd məğlubiyyətimdə hakimlərin də rolu oldu. Rəqibə 2 xal artıq verildi. Görüş onun vətənində keçirildiyindən hakim köməyinin olması təbiidir. Ancaq son saniyələrdə etdiyim fənd alınsaydı, qələbə qazanacağdım”.

Güləşçi çəkisində güclü rəqabətin olduğunu da bildirib: “65 kiloqram çəki dərəcəsi ən güclü çəkilərdən biridir. Bütün rəqiblər güclüdür. Bildiyiniz kimi, bu il dünya çempionatı lisenziya xarakteri daşıyacaq. Bütün güləşçilər var gücünü ortaya qoyacaq. Fikrimcə, əsas rəqiblər Rusiya, Kuba, Hindistan və Yaponiya güləşçiləri olacaq. İkinci Avropa Oyunlarında isə Rusiya idmançısı ilə yanaşı, Gürcüstan və Ukrayna təmsilçilərini də təhlükəli rəqib saymaq olar. Əlimdən gələni edəcəyəm ki, yaxşı nəticə göstərim. Neçə ildi güləşdəyəm. Təcrübəm yetərincədir. Sadəcə, bir qədər fiziki gücü artırmaq lazımdır”.

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: