“Gənclərin Şəxsi İnkişaf Həftəsinə” start verilib - FOTOLAR

NUHÇIXAN xəbər verir ki, sentyabrın 8-də “Naxçıvan Təlim Mərkəzi” PHŞ və Naxçıvan Muxtar Respublikasının Gənclər və İdman Nazirliyinin birgə təşkilatçılığı ilə gənclərin potensialının üzə çıxarılması və inkişafına xidmət edən “Gənclərin Şəxsi İnkişaf Həftəsi”nə start verilib. Beş gün davam edəcək proqram çərçivəsində müxtəlif istiqamətləri əhatə edən təlimlər gənclərə təqdim olunacaq.

Proqramın ilk günü Naxçıvan Teleradio Verilişləri QSC-nin sədr müavini, sədr vəzifələrini icra edən İlhamə Novruzovanın “İlhamlandır və irəli apar” mövzusunda təlimi ilə başladı. Təlimdə ümumilikdə 30 gənc iştirak etdi. İnteraktiv şəkildə təşkil olunan proqramda iştirakçılar komandalar üzrə tapşırıqlar yerinə yetirərək, real situasiyalar üzərində simulyasiyalar aparıb, praktik bacarıqlarını nümayiş etdirmək imkanı qazanıblar. Sessiyanın sonunda isə sual-cavab bölməsi keçirilib, təlim xüsusi testlərlə yekunlaşıb.

Qeyd edək ki, həftə ərzində keçiriləcək bütün təlimlər dövlət qurumlarında fəaliyyət göstərən peşəkar və təcrübəli şəxslər tərəfindən aparılacaq. Növbəti günlərdə gənclər Tükəzban Quliyevanın “Karyeranı planlaşdır və gələcəyini inşa et!”, Günay Nəzərovanın “Motivasiya – uğura gedən yol!”, Gülxanım Orucovanın “Layihələrin idarə edilməsi” və Aslan Səfərovun “Sosial şəbəkələr və şəxsi brend: Effektiv start” mövzularında təlimlərində iştirak edəcəklər.
Bu layihə gənclərin şəxsi inkişafına dəstək olmaqla yanaşı, onların gələcək karyeraları və sosial həyatda daha aktiv rol almalarına mühüm töhfə verəcək.