Stolüstü tennisçilər Özbəkistandan 7 medalla qayıdırlar

Azərbaycanın stolüstü tennisçiləri Özbəkistanın Andijan şəhərində Rafik Şiriyevin xatirəsinə həsr olunan ənənəvi turnirdə uğurla çıxış ediblər.

NUHÇIXAN xəbər verir ki, yarışda ən yaxşı nəticəni Mehin Mirzəbalayeva göstərib. 13 yaşadək idmançılar arasında bütün rəqiblərinə qalib gələn istedadlı idmançı fəxri kürsünün ən yüksək pilləsinə qalxıb.

Yalnız finalda uduzan Gülnur Kərimli (U 11) ikinci, Səidə Quluzadə (U 13) ilə Yağmur Məmmədli (U 15) üçüncü yeri tutublar.

Xatırladaq ki, mayın 13-dən 16-dək Daşkənddə təşkil olunan “WTT Youth Contender” turnirində Onur Quluzadə ikinci, Cəfər Almədədli ilə Mehin Mirzəbalayeva üçüncü olmuşdu. Beləliklə, gənclərdən ibarət milli komandalar Vətənə 7 mükafatla qayıdırlar.