Kəngərli və Culfa rayonlarının məktəbli şahmatçıları görüşüblər - FOTOLAR

NUHÇIXAN xəbər verir ki, Akademik Zərifə xanım Əliyevanın anadan olmasının 96-cı ildönümü münasibətilə Kəngərli və Culfa rayonlarının məktəbli şahmatçıları arasında yoldaşlıq görüşü olub.

Kəngərli və Culfa rayonlarının ümumtəhsil məktəblərindən 38 şagirdin iştirak etdiyi yoldaşlıq görüşündə 8-12 və 12-16 yaş qrupunda olan şahmatçılar mübarizə aparıblar. 16 yaşadək şahmatçılar arasında Culfa şəhər 2 nömrəli tam orta məktəbin şagirdi Elcan Qulamzadə I, Culfa şəhər 3 nömrəli tam orta məktəbin şagirdi Vüsal Hüseynli II, Qıvraq qəsəbə tam orta məktəbin şagirdi Pərviz Rzayev III yerlərə layiq görülüblər.

12 yaşadək şahmatçılarda isə Qıvraq qəsəbə tam orta məktəbin şagirdi Yusif Günəşov I, Culfa şəhər 2 nömrəli tam orta məktəbin şagirdi Turan Nağıyev II, həmin məktəbin şagirdi Şamil Dünyamalılı III yerlərə layiq görülüblər.

Şahmat yarışının qalibləri təşkilatçılar tərəfindən diplom və qiymətli hədiyyələrlə mükafatlandırılıb.

Yoldaşlıq görüşündən sonra məktəbli şahmatçılar Qarabağlar Türbə Kompleksində olublar. Burada şahmatçılara kompleks haqqında ətraflı məlumat verilib.

Ərhan Novruzov