Azərbaycan avarçəkəni Litvada gümüş medal qazanıb
Akademik avarçəkmə üzrə gənclərdən ibarət Azərbaycan millisinin üzvü Azər İlyasov Litvanın Şaulyay şəhərində keçirilən açıq Litva çempionatında gümüş medal qazanıb.
Federasiyadan NUHÇIXAN-a bildirilib ki, hazırda Litvada təlim-məşq toplanışında olan idmançının iştirak etdiyi yarışda yerli avarçəkənlərlə yanaşı, ABŞ, İsveçrə və İsrail təmsilçiləri də mübarizə aparıblar.
Azər İlyasov 15 iştirakçının yer aldığı yarımfinal mərhələsini uğurla adlayaraq A finalına vəsiqə qazanıb. Yağışlı və küləkli hava şəraitində keçirilən həlledici yürüşdə təmsilçimiz 2000 metr məsafəni 7 dəqiqə 52 saniyəyə qət edib. O, yalnız ev sahibi ölkənin idmançısından geri qalaraq yarışı ikinci pillədə başa vurub və gümüş medala sahib çıxıb.