“Naxçıvan 2019” Beynəlxalq Şahmat Festivalında altıncı turun nəticələri

NUHÇIXAN xəbər verir ki, ümummilli lider Heydər Əliyevin anadan olmasının 96 illiyi münasibətilə Naxçıvan şəhərində keçirilən “Naxçıvan 2019” Beynəlxalq  Şahmat Festivalının altıncı turunun nəticələri məlum olub.

“A” qrupunda yüksək reytinq uğrunda  mübarizə aparan şahmatçılardan  ilk 3 yeri Ortik Niqmatov (Özbəkistan), Timur Qareyev (ABŞ), Vadim  Malaxatko (Belarus) öz aralarında bölüşürlər.

Bu qrupda yer alan Naxçıvan şahmatçılarından Urfan Sevdimalıyev və  Toğrul Həsənzadə  altıncı   görüşü heç-heçə ilə başa vurublar. Sadiq Məmmədov isə yarış masasını məğlub tərk edib. Bu turda bir-biri ilə qarşılaşan  digər iki təmsilçimizdən  Talıb Babayev və Pərviz Qasımovun  görüşündən ikinci qalib ayrılıb.

“B” qrupuna Bakı şahmatçısı Elxan Bayramov başçılıq edir. Ağdam  idmançısı Fariz Əhmədov və Gəncə şahmatçısı Amil Abbasov  ikinci və üçüncü pillələri bölüşürlər.

12 yaşadək şahmatçıların yer aldığı “C” qrupuna liderliyi Gəncə  şahmatçısı Niyazı Qafarov edir, digər yerləri isə Ordubad idmançıları Uğur Həsənli və Elçin Rza öz aralarında bölüşürlər. Qeyd edək ki, 9 turdan ibarət şahmat festivalı mayın 10-da yekunlaşacaq.