NUHÇIXAN xəbər verir ki, ümummilli lider Heydər Əliyevin anadan olmasının 96 illiyi münasibətilə Naxçıvan şəhərində keçirilən “Naxçıvan 2019” Beynəlxalq Şahmat Festivalının yeddinci turunun nəticələri məlum olub.
“A” qrupunda yüksək reytinq uğrunda mübarizə aparan şahmatçılardan ilk 3 yeri Timur Qareyev (ABŞ), Ortik Niqmatov (Özbəkistan) və Vadim Malaxatko (Belçika) öz aralarında bölüşürlər.
Bu qrupda yer alan Naxçıvan şahmatçılarından Pərviz Qasımov masadan qalib kimi ayrılıb. Urfan Sevdimalıyev və Toğrul Həsənzadə yeddinci görüşü də heç-heçə ilə başa vurublar. Sadiq Məmmədov və Talıb Babayev isə məğlubiyyətlə barışmalı olublar.
“B” qrupuna bu dəfə də Bakı şahmatçısı Elxan Bayramov başçılıq edir. Gəncə şahmatçıları Amil Abbasov və Babək Cəfərli ikinci və üçüncü pillələri bölüşürlər.
12 yaşadək şahmatçıların yer aldığı “C” qrupuna liderliyi Rusiya şahmatçısı İlqar Məmmədov edir, digər yerləri isə Gəncə idmançısı Niyazi Qafarov və Ordubad təmsilçisi Uğur Həsənli öz aralarında bölüşürlər. Qeyd edək ki, 9 turdan ibarət şahmat festivalı mayın 10-da yekunlaşacaq.