Naxçıvan güləşçisi Hacı Əliyev erməni idmançısını məğlub etdi

Minskdə keçirilən ikinci Avropa Oyunlarında sərbəst güləş üzrə üçqat dünya çempionumuz Hacı Əliyev ilk görüşündə Ermənistan idmançısı Volodya Franqulyanla qarşılaşıb.

NUHÇIXAN xəbər verir ki, dünya və Avropa çempionumuz rəqibi üzərində 6:0 hesabı ilə inamlı qələbə qazanıb.

Bundan başqa, 74 kiloqram çəki dərəcəsində çıxış edən Hacımurad Hacıyev Yunanıstandan olan rəqibinə 10:3 hesabı ilə qalib gələrək bürünc medal uğrunda yarışa vəsiqə qazanıb. Onun rəqibi ukraynalı Vasili Mixaylov olacaq.

Qeyd edək ki, axşam saatlarında keçiriləcək görüşlərdə Hacımurad Hacıyevdən başqa, Mahir Əmiraslanov (-57 kq), Aleksandr Qostiyev (-86 kq) və Camaləddin Məhəmmədov (-125 kq) da medal qazanmaq üçün döşək üzərinə çıxacaqlar. Mahir Əmiraslanov qızıl, digər idmançılarımız isə bürünc medal uğrunda mübarizə aparacaqlar.