“Real Madrid” klubu “El klassiko”da qalib gələrək turnir cədvəlində liderliyə yüksəlib

Martın 1-də futbol üzrə İspaniya La Liqasının 26-cı turunun mərkəzi qarşılaşması keçirilib.

NUHÇIXAN xəbər verir ki, maraqla gözlənilən və “El klassiko” adlanan görüşdə “Real Madrid”–“Barselona” komandaları üz-üzə gəlib. “Santiaqo Bernabeu” stadionunda 75 min 557 nəfərin izlədiyi görüşdə “Real Madrid” qələbə qazanıb (2:0).

Oyunda birinci hissədə hesab açılmasa da, “Real Madrid” fasilədən sonra ardıcıl iki dəfə fərqlənərək vacib qələbə qazanıb. Vinisius Junior (71) və Mariano Diaz (90) fərqləniblər.

Bu qələbədən sonra aktivinə 56-ci xalı yazan madridlilər turnir cədvəlində liderliyə yüksəlib. “Barselona” isə 55 xalla ikinci yerdə qərarlaşıb. “Barselona” və “Real Madrid”in çempionatdakı ən yaxın izləyicisi “Sevilya”nin 46 xalı var.

Bu, La Liqada 180-ci “El klassiko” olub. İndiyədək keçirilən görüşlərdə “Real Madrid” 73 dəfə, “Barselona” isə 72 dəfə qalib gəlib. Otuz beş oyun heç-heçə başa çatıb.