“Qarabağ” klubu Fransanın “Lans” komandasının yarımmüdafiəçisini heyətinə qatıb

2018/2019-cu il mövsümünün hazırlığını davam etdirən “Qarabağ” klubu heyətini gücləndirməyə davam edir.

NUHÇIXAN xəbər verir ki, “Qarabağ” fransalı futbolçu Abdullah Zubiri heyətinə qatıb. Futbolçu ilə iki illik müqavilə imzalanıb.

Peşəkar karyerasına 2011-ci ildə Fransanın “Qrenobl” klubunda başlayan Zubir bir mövsüm sonra eyni ölkənin “İstr” komandasına keçib. Yarımmüdafiəçi 2013/2014-cü il mövsümünün ikinci yarısında icarə əsasında Şotlandiyanın “Hibernian” klubunda çıxış edib, daha sonra yenidən müqavilə ilə məxsus olduğu “İstr”a qayıdıb. 2015/2016-ci il mövsümündə Rumıniyanın “Petrolul” klubuna transfer olunub.

Daha sonra Fransanın “Lans” klubuna keçən fransalı yarımmüdafiəçi son iki mövsümü burada keçirib. İyirmi altı yaşlı futbolçu “Lans” forması ilə meydanda olduğu 70 oyunda 6 qol və 12 məhsuldar ötürmə ilə yadda qalıb.