Çimərlik futbolu üzrə muxtar respublika çempionatının püşkü atılıb

NUHÇIXAN İnformasiya Agentliyi xəbər verir ki, Naxçıvan Muxtar Respublika Stadionunun inzibati binasında keçirilən püşk atma mərasimində ilk dəfə olaraq reallaşacaq çempionat və oyunun qaydaları haqqında iştirakçılara ətraflı məlumat verilib. Naxçıvan MR Gənclər və İdman Nazirliyi, Futbol Federasiyası və AFFA-nın təşkilatçılığı, “Arazbet”in baş sponsorluğu ilə keçiriləcək yarışda 12 komanda 4 qrupa bölünüb. Onlayn qaydada keçirilən püşk atmanın nəticəsinə əsasən, A qrupunda “Bənəniyar”, “Prestij”, “Badamlı”, B qrupunda “Aralıq”, “Şahinlər”, “Batabat”, C qrupunda “Panter”, “Əlincə”, “Hava Limanı”, D qrupunda isə “Universitet”, “Yaycı” və “Antiinhisar” komandaları birincilik uğrunda mübarizə aparacaq. Dairəvi sistemlə oynanılacaq qarşılaşmalardan sonra qrupda ilk iki yeri tutan komandalar pley-off mərhələsinə yüksələcəklər.

Qeyd edək ki, çempionatda ilk turun oyunlarına avqustun 6-da start veriləcək. Qaliblər təşkilatçılar tərəfindən mükafatlandırılacaqlar.

    Elvin Quliyev