UEFA Çempionlar Liqasının ən yaxşı futbolçusu adına namizədlər müəyyənləşib

UEFA Çempionlar Liqasının dörddəbir final mərhələsinin yekunları əsasında ən yaxşı futbolçunun müəyyənləşdirilməsi üçün səsverməyə start verilib.

NUHÇIXAN İnformasiya Agentliyi xəbər verir ki, siyahıya dörd futbolçunun - “Paris Sen-Jermen” klubunun hücumçusu Neymar, “Leyptsiq”in müdafiəçisi Dayot Upamekano, “Bavariya”nın forvardı Tomas Müller və “Lion”un ön xətt oyunçusu Mussa Dembelenin adları daxil edilib.

Neymar “Atalanta” ilə görüşün (2:1) ən yaxşısı seçilib. D.Upamekanonun çıxışı sayəsində komandası Madridin “Atletiko” klubu ilə qarşılaşmada qalib gələrək (2:1) yarımfinala vəsiqəni təmin edib. Tomas Müller “Bavariya”nın “Barselona”nı darmadağın etdiyi (8:2) görüşdə iki dəfə fərqlənib. Mussa Dembele isə “Mançester Siti” komandası (3:1) ilə qarşılaşmada dubl edib.

UEFA Çempionlar Liqasının yarımfinalında “Leyptsiq” - “Paris Sen-Jermen” və “Lion” – “Bavariya” görüşləri keçiriləcək.