Naxçıvanın beşqat dünya mükafatçısı

Bu gün Azərbaycan dünyada idman ölkəsi kimi tanınır və bu ta­nınmada güləşçilərimizin uğurları, beynəlxalq arenalarda əldə etdikləri nəticələrin böyük rolu var. Ölkəmizdə əsasını ulu öndər Heydər Əliyevin qoyduğu və dövlətimizin başçısı İlham Əliyev tərəfindən davam etdirilən idman siyasətinin, idmana və idmançılara göstərilən həssas münasibətin nəticəsidir ki, digər idman növləri kimi güləş məktəbi də getdikcə inkişaf edir, güləşçilərimiz yeni-yeni zirvələr fəth edir, bu yolda inamla irəliləyirlər.

Azərbaycanda idman dövlət siyasətinin mühüm istiqamətlərindən biridir. Prezi­dent İlham Əliyevin bu sahəni daim diqqətdə saxlaması, idmançıların hazırlaşması üçün bütün lazımi şəraitin, infrastrukturun yaradılması, onların diqqət və qayğı ilə əhatələnməsi qələbələrin qa­zanılmasında ən mühüm amil­dir. Respublikamızda idmana və idmançılara göstərilən qayğı, idmana cavabdehlik daşıyan bütün qurumların – Gənclər və İdman Nazirliyi, Milli Olimpiya Komitəsi, federa­siyalar, idman cəmiyyətləri, id­man mütəxəssisləri, məşqçilər və idmançıların vahid mövqe nümayiş etdirərək bir ailə kimi fəaliyyət göstərməsi uğurun əsas şərtidir.

Dövlətin idman sahəsindəki siyasəti, habelə Güləş Federasiyasının işini müasir tələblər səviyyəsində qurma­sı bu sahədə ciddi dönüşün yaranmasına səbəb olub. Belə ki, federasiya rəhbərliyi güləşi daha da kütləviləşdirmək, regionlarda çox sayda yeniyetmə və gənci güləşə cəlb etmək üçün genişmiqyaslı iş aparır. Güləş Federasiya­sının regionlarla sıx əlaqələr qurması, yerlərdə güləşçilərin qayğı və problemlərinə həssas münasibət bəsləməsi də bu sahədə önəmli addım sayıl­malıdır.

Naxçıvanda yaşayan beşqat dünya mükafatçısı Rövşən İsmayılxanlı respub­likada idmanın bu növü ilə bağlı söhbət zamanı dedi:

– Son 17 ildə Azərbaycan güləş məktəbinin nümayəndələri bütün ya­rışlarda böyük uğurlar əldə ediblər. Pəhləvanlarımız iştirak etdikləri istənilən turnirin favo­riti kimi dəyərləndiriliblər. Avro­pa və dünya çempionatlarında, habelə beynəlxalq turnirlərdə çoxsayda qızıl, gümüş və bürünc medallar qazanıblar. Bu nəticələrlə güləşçilərimiz Azərbaycanın idman şöhrətini zirvələrdə saxlayıblar.

Dövlət başçısı İlham Əliyev Güləş Federasiyasının işini yüksək qiymətləndirib: “Son illər ərzində Güləş Federasiya­sında doğrudan da ciddi dönüş yaranıb. Çox gözəl ab-hava vardır. Bilirəm ki, idmançı­larla federasiya əməkdaşları arasında, məşqçilər arasın­da çox gözəl münasibətlər vardır. Bu, məni çox sevindirir və hesab edirəm ki, hər bir sahədə işlər düzgün təşkil olunanda nəticələr də yüksək olur. Bu qələbələr, ilk növbədə, idmançıların qələbələridir, onların uğurudur. Ancaq əlbəttə ki, məşqçilər, idman mütəxəssisləri, federasiya rəhbərliyi bu qələbəyə öz töhfəsini vermişdir”.

Hazırda güləş ölkəmizdə ən populyar idman növlərindən biridir. Bu, həm tarixi-ənənəvi köklərlə, həm də hazırda respublikamızda idmana, o cümlədən, güləşə olan münasibətlə bağlıdır. Qobus­tan qayalarının üzərində olan rəsmlər Azərbaycanda hələ qədim zamanlarda güləşlə məşğul olunduğunu göstərir. Tarixi kökü olan bu idman növü ölkəmizdə heç vaxt ənənəsini itirməyib. Düzdür, müəyyən vaxtlarda bu sahədə tənəzzül nəzərə çarpıb. Lakin uzun illər ərzində forma­laşan möhkəm baza güləş məktəbinin tamamilə sıradan çıxmasına imkan verməyib. Müstəqilliyimizin bərpasından sonra Azərbaycan idmanının beynəlxalq miqyasda qazan­dığı ilk medallar da məhz güləşçilərimizin adı ilə bağlıdır.

Xatırladım ki, həmsöhbətim Rövşən İsmayılxanlı 1963-cü il iyunun 1-də Naxçıvanda ana­dan olub. O, 1970-77-ci illərdə şəhərdəki  6 saylı orta məktəbdə oxu­yub. Sonra Bakı şəhər idman təmayüllü internat məktəbində və Azərbaycan Dövlət Bədən Tərbiyəsi İnstitutunda təhsil alıb. 1984-86-cı illərdə isə hərbi xidmətdə olub. 1986-cı ildən Naxçıvan Muxtar Respublikasında“”Spartak” idman cəmiyyətində idman bazasının direktoru vəzifəsində çalışıb.

R.İsmayılxanlı 1990-2015- ci illərdə Naxçıvan Muxtar Respublikası Da­xili İşlər Nazirliyində müxtəlif vəzifələrdə xidmət edib. Bu­rada qüsursuz fəaliyyətə görə medallarla və əlaçı döş nişanı ilə təltif olunub. O, 1990-1994-cü illərdə sərhədlərimizin qorunmasında da fəallıq göstərib. Qarabağ müharibəsi veteranıdır.

R.İsmayılxanlı 1970-ci ildən idmanın güləş növü ilə məşğul olub. Ayrı-ayrı vaxtlar­da Bakı və Azərbaycan çem­pionu adını qazanıb. Beşqat dünya mükafatçısıdır.

R.İsmayılxanlı söhbətində güləşdə əldə etdiyi uğurlardan danışarkən, bir məqamı xüsusi vurğuladı:

–Respublikamızda bu idman növü tarixən ənənəsini qoruyub saxlayıb. Azərbaycan pəhləvanları dünya və Avropa çempionatlarında, Olimpiya Oyunlarında və digər mötəbər yarışlarda öz peşəkarlıqları və ustalıqları ilə xalqımızı sevindi­rib, bayrağımızı ucaldıblar.

Digər idman növləri kimi, güləş də ölkə rəhbərliyinin daim diqqət və qayğısı ilə əhatə olunub. Elə bu­nun nəticəsidir ki, son illər beynəlxalq yarışlarda böyük uğurlar qazanan yeniyetmə, gənclər və əsas komanda üzvləri ilə yanaşı, veteran id­mançılarımız da iştirak etdikləri bütün turnirlərdən müxtəlif əyarlı medallarla vətənə qayı­dıblar.

R.İsmayılxanlının bu fikri­nin təsdiqi üçün bir faktı xatır­ladım. Ötən ilin oktyabr ayında Gürcüstanın paytaxtı Tbilisidə keçirilən veteran güləşçilər arasında 21-ci dünya çempio­natında məşhur pəhləvanımız, 130 kiloqram çəki dərəcəsində mübarizə aparan Rövşən İsmayılxanlı yunan-Roma növündə Qazaxıstan, ABŞ, Macarıstan və digər ölkələrin təmsilçilərinə qalib gələrək bürünc medal əldə edib. Bu, veteran güləşçimizin ardıcıl olaraq dünya çempionatlarında qazandığı beşinci medal idi.

Yeri gəlmişkən, pəhləvanımız 2015-ci ildə Yunanıstanda bürünc, 2016- cı ildə Finlandiyada gümüş, növbəti il Bolqarıstanda gümüş və 2018-ci ildə Rusiyada gü­müş medala sahib çıxıb.

Hazırda Naxçıvan Dövlət Universitetində hüquq fənləri kafedrasında müəllim vəzifəsində çalışan veteran idmançı ulu öndər Heydər Əliyevin “Azərbaycanda güləş milli və ən məşhur idman növüdür, bütün dövrlərdə bizim çox məşhur güləşçilərimiz olmuşdur. Onlar müxtəlif beynəlxalq yarışlarda böyük uğur qazanmışlar” sözlərini daim rəhbər tutaraq gənc nəslin təlim-tərbiyəsində, idma­na cəlb edilməsində və zərərli vərdişlərdən uzaq olmasında yaxından iştirak edir və bunun üçün səylərini əsirgəmir.

R.İsmayılxanlı növbəti mundi­allarda da layiqli çıxış edərək yüksək nəticələr qazanmaq arzusu ilə yaşayır.

Vaqif Bayramov

“Xalq" qəzeti