İctimai həyatda və yaradıcılıq sahəsində fərqlənən gənclər mükafatlandırıldı - FOTOLAR

NUHÇIXAN İnformasiya Agentliyi xəbər verir ki, “31 dekabr Dünya Azərbaycanlılarının Həmrəylik Günü” münasibətilə keçirilən mükafatlandırma mərasimi Naxçıvan Muxtar Respublikası Gənclər və İdman Nazirliyinin, Gənclər Fondunun və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin təşkilatçılığı ilə baş tutub.

Naxçıvan Muxtar Respublikasının Gənclər və İdman naziri, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin sədri Azad Cabbarov vurğulayıb ki, Ümummilli liderimiz Heydər Əliyevin şəxsi təşəbbüsü ilə qeyd olunan bu bayram  dünya azərbaycanlılarının vahid Vətəni–Azərbaycan Respublikasının ictimai-siyasi maraqları ilə bir olmağa, həmrəyliyə çağırış bayramıdır. 2020-ci ildə biz xalqımızın həmrəyliyinin ən bariz nümunəsinin şahidi olduq. Sentyabrın 27-dən başlayaraq Azərbaycan Ordusunun həyata keçirdiyi əks-hücum əməliyyatları nəticəsində 30 ilə yaxındır işğal altında olan ərazilərimiz düşməndən azad olundu. Gənclərimizin bu cür vətənpərvərliyi, Vətənə, elə bağlılığı, hünəri, qorxmazlığı yaradılan şəraitin, aparılan dövlət gənclər siyasətinin bəhrəsidir.

Sonra “İlin gənc jurnalisti”, “İlin gənc musiqiçisi”, “İlin gənc rəssamı”, “İlin fəal xəbər saytı”, “İlin gənc məşqçisi”, “İlin gənc idmançısı”,  “Əlaçı tələbə”, “Əlaçı şagird”, “İstedadlı gənc”, “Fəal gənc” nominasiyaları üzrə bir qrup gənc fəxri fərman, diplom və qiymətli hədiyyələrlə mükafatlandırılıb.                    

Həmçinin tədbirdə 44 günlük Vətən müharibəsində peşəkar döyüş qabiliyyətləri və ən əsası böyük Vətən sevgiləri ilə 30 ilə yaxın bir müddətdə işğal altında olan ərazilərimizi düşməndən azad edən qəhrəmanlarımızın da  bir neçəsi  təltif edilib.

                                                                                                              Rəmzi Tahirli