Peyntbol üzrə muxtar respublika birinciliyi keçirilib - FOTOLAR

Naxçıvan Muxtar Respublikası Gənclər və İdman Nazirliyinin mətbuat xidmətindən NUHÇIXAN İnformasiya Agentliyinə bildirilib ki,  yarış Naxçıvan Muxtar Respublikası Gənclər və İdman Nazirliyi  və Atıcılıq Federasiyasının birgə təşkilatçılığı ilə Atıcılıq Mərkəzinin peyntbol arenasında baş tutub. Ali və orta ixtisas təhsili müəssisələrinin oğlanlardan ibarət komandaları arasında keçirilən, gənclərə vətənpərvərlik ruhunun aşılanması, asudə vaxtlarının idmanla dəyərləndirilməsi və atıcılıq idman növlərinin təbliği məqsədini daşıyan yarışda  Olimpiya sisteminə əsasən qaliblər müəyyənləşdirilib. Naxçıvan Dövlət Universiteti (NDU) və “Naxçıvan” Universitetinin (NU) komandaları finalda bir-birinə rəqib olub. Həlledici oyunun  qalibi olan NDU peyntbol üzrə muxtar respublika birincisi adına layiq görülüb. NU və  Naxçıvan Tibb Kollecini təmsil edən komandalar müvafiq olaraq 2-ci, 3-cü sıralarda qərarlaşıblar.

Mükafatlandırma mərasimində Naxçıvan Muxtar Respublikası Gənclər və İdman Nazirliyinin şöbə müdiri Taleh İbrahimov və Federasiyanın sədr müavini Vasib Abdullayev yarışın keçirilmə məqsədlərindən bəhs edib, iştirakçılara uğurlar arzulayıblar. 

İlk üçlükdə qərarlaşan komandalara diplom, kubok və peyntbol mərmiləri təqdim edilib.