Qadınlar arasında beynəlxalq usta Səbinə İbrahimova: Bu yarışlar Naxçıvandan olan şahmatçılar üçün də bir təkan, stimuldur.
NUHÇIXAN İnformasiya Agentliyinin məlumatına görə, Naxçıvan Şahmat Federasiyasının təşkilatçılığı ilə keçirilən bütün yarışların həm təşkilatçılıq səviyyəsinin, həm də oyunçuların güclü olduğunu deyən beynəlxalq usta bildirib ki, 2013-cü ildən Naxçıvanda keçirilən yarışlarda iştirak edir.
“Burada təşkil edilən beynəlxalq şahmat festivallarına güclü qrosmeysterlər gəlir. Naxçıvanda təşkil edilən qadınlar arasında şahmat üzrə Azərbaycan çempionatı isə yüksək səviyyədə davam edir. Bundan əvvəl kişilər arasında Azərbaycan çempionatı keçirilirdi. Bu yarışlar Naxçıvandan olan şahmatçılar üçün də bir təkan, stimuldur. Belə yarışların təşkili iştirakçıların təkmilləşməsinə, inkişafına şərait yaradır. Mənim də yaxşı nəticələrim olub, Naxçıvanda bu sahə üzrə xeyli təcrübə qazanmışam. Deyərdim ki, Naxçıvan şəhəri gözəl, tarixi şəhərdir, həm də məsafə cəhətdən yaxın olduğu üçün çempionatın burada təşkili məni sevindirdi. Hazırkı yarışda ilk turdan etibarən gərgin mübarizə gedir. Hələ çempionatın başa çatmasına bir neçə tur var. Çalışacağam ki, digər oyunlarda müsbət nəticələr əldə edim”.
Güntac Şahməmmədli