Gənclər Culfa rayon şəhidlərinin ailələrini ziyarət etdilər - FOTOLAR

Naxçıvan Muxtar Respublikası Gənclər və İdman Nazirliyinin mətbuat xidmətindən NUHÇIXAN İnformasiya Agentliyinə bildirilib ki, nazirliyin, Gənclər Fondunun və bir qrup könüllü gəncin iştirakı ilə Culfa rayonunda yaşayan şəhid ailələri ziyarət olunub.

Gənclər əvvəlcə Camaldın kəndində şəhidlərimiz - Azərbaycan Daxili İşlər Nazirliyi Daxili Qoşunlarının kapitanı Babayev Şamil Baloğlan oğlu və leytenant Qasımov Hafis Cavanşir oğlunun, daha sonra Yaycı kəndindən olan şəhidlərimiz  Rzalı Daşqın Elşad oğlu və Məmmədov Sahib Yaşar oğlunun ailə üzvləri ilə görüşüb, qəhrəman şəhidlərimizin keçdiyi döyüş yolundan, qəhrəmanlıqlarından söz açıblar. İştirakçılara şəhidlərimizin xidməti fəaliyyəti, təltif edildikləri orden və medallar barədə məlumat verilib. Ailə üzvləri onların özünəməxsus xüsusiyyətləri ilə bağlı fikirlər səsləndirib, xatirələrini bölüşüblər. Görüşlərin ardından şəhid məzarları ziyarət edilib, onların ruhuna dualar oxunub.

Gənclər və idman nazirinin müavini Məcid Seyidov və Gənclər Fondunun direktoru Cəbi Quliyev görüşlər zamanı şücaətli, cəsur, eyni zamanda vətənpərvər övlad yetişdirdikləri üçün şəhid valideynlərinə dərin minnətdarlıqlarını bildiriblər.