Beynəlxalq dərəcəli idman ustası Rövşən Hacıyev Naxçıvanda güləşçilər üçün seminar keçib - FOTOLAR

Gənclər və İdman Nazirliyinin mətbuat xidmətindən NUHÇIXAN İnformasiya Agentliyinə bildirilib ki, Naxçıvan şəhər Uşaq-Gənclər İdman Məktəbində baş tutan  seminarda sərbəst güləş növü ilə məşğul olan idmançılar iştirak edib. Seminara gənclərdən ibarət milli komandanın məşqçisi – beynəlxalq dərəcəli idman ustası,əməkdar məşqçi Rövşən Hacıyev rəhbərlik edib. Tədbirdə paytaxt Naxçıvan və bölgələrdən ümumilikdə 60-a yaxın idmançı, o cümlədən məşqçilər iştirak edib.

Hacı Əliyev kimi dünya miqyasında tanınan bir idmançının bu sahədə ilk addımlarını məhz Naxçıvan güləş məktəbində atdığını güləşçilərə xatırladan Rövşən Hacıyev vurğulayıb ki, bu amil hər biriniz üçün ümid və inam qaynağı olmalıdır.

Çıxışların ardından məşq prosesinə başlanılıb. İsinmə hərəkətlərinin ardınca Rövşən Hacıyev sərbəst güləşçinin oyun zamanı və buna qədər hansı amillərə diqqət yetirəcəyi haqda danışıb. Müdafiə, hücum və əks-hücum zamanı yaranan vəziyyətlər və bu anda tətbiq olunacaq manevrlər nümayiş etdirilib, güləşdə tətbiq olunan ən son qaydalar barədə məlumat verilib. Məşqçi və idmançıları maraqlandıran suallar təcrübəli mütəxəssis tərəfindən cavablandırılıb.

Qeyd edək ki, seminar Gənclər və İdman Nazirliyi ilə Güləş Federasiyası tərəfindən birgə təşkil olunub.