“Yay məktəbi”nin budəfəki iştirakçıları ali təhsil ocaqlarının tələbələri olub - FOTOLAR

Gənclərin tətil günlərində istirahətinin səmərəli təşkili məqsədilə Ağbulaq İstirahət Mərkəzində “Yay məktəbi” davam etdirilir.

NUHÇIXAN İnformasiya Agentliyi xəbər verir ki, Naxçıvan Muxtar Respublikası Gənclər və İdman Nazirliyi, Gənclər Fondu, Həmkarlar İttifaqları Şurası, YAP Naxçıvan Muxtar Respublika Təşkilatının Heydər Əliyev adına Gənclər Birliyi tərəfindən təşkil olunan  növbəti “Yay məktəbi” 3 gün davam edib. “Yay məktəbi”nin budəfəki iştirakçıları Naxçıvan Dövlət Universiteti, “Naxçıvan” Universiteti və Naxçıvan Müəllimlər İnstitutunda təhsil alan tələbələr  olub.

Əvvəlcə iştirakçılara mərkəzin turizm imkanları, ərazidəki fəaliyyət növləri, həmçinin tədbirin təşkil olunma məqsədləri və proqramı barədə məlumat verilib. 3 gün ərzində müxtəlif idman və intellektual oyunlarda bacarıqlarını sınağa çəkən  gənclərin Ağbulaq kəndinə gəzintiləri də təşkil olunub. Proqram çərçivəsində gənclər foto-müsabiqədə və “Gələcək üçün maliyyə” mövzusunda təlimdə də fəal iştirak  ediblər. Həmçinin onlar  keçirilən  STEAM təliminə böyük  maraq göstəriblər.

Yay məktəbinin sonuncu günü proqrama əsasən təşkil olunan fəaliyyət növlərində fərqlənən gənclər, müsabiqə və yarışların qalibləri mükafatlandırılıb.

Qeyd edək ki, Ağbulaq İstirahət Mərkəzində “Yay məktəbi” davam edir.

Hafizə Əliyeva