Naxçıvanda Tələbə Gənclər Həftəsinə start verilib - FOTOLAR
Naxçıvanda Gənclər və İdman Nazirliyi, Gənclər Fondu və YAP Naxçıvan Muxtar Respublika Təşkilatının İcra Katibliyinin birgə təşkilatçılığı ilə 10-17 noyabr – Beynəlxalq Tələbə Gənclər Həftəsi çərçivəsində silsilə tədbirlərə start verilib. NUHÇIXAN İnformasiya Agentliyi xəbər verir ki, ötən gün ilk olaraq Naxçıvan şəhərindəki “Gənclik” Mərkəzində film nümayiş etdirilib.
Türkiyə kinematoqraflarının lentə aldığı filmi 200-ə yaxın gənc izləyib. Məqsəd gənclərin dünyagörüşlərini zənginləşdirmək və onların mənəvi həyat tərzlərini doğru istiqamətdə qurmalarına zəmin yaratmaqdan ibarət olub.
Qeyd edək ki, Naxçıvanda tələbə-gənclərin milli dövlətçilik, Azərbaycançılıq, vətənpərvərlik ruhunda formalaşması üçün məqsədyönlü tədbirlər həyata keçirilir. Bu il Beynəlxalq Tələbə-Gənclər Həftəsi çərçivəsində boks, kartink, badminton, tennis, peyntbol, oxçuluq üzrə müxtəlif idman yarışları keçiriləcək. Tələbə-gənclərin muzeylərə ekskursiya, onlar arasında intellektual oyun və müxtəlif müsabiqələr təşkil olunacaq. Sonda isə həftə ərzində fərqlənən gənclərin, qalib gənclərin mükafatlandırılması olacaq.
Mədinə Rəhimli