Naxçıvanlı boksçu dünya kubokunun mükafatçıları sırasında yer alıb
Rusiyanın Nijnevartovsk şəhərində 19-40 yaşlı qadın və kişi idmançılar arasında boks üzrə neft ölkələrinin XVIII dünya kubokunda Naxçıvan Boks Federasiyasının yetirməsi Eldar Quliyev turnirdə 86 kiloqram çəki dərəcəsində ölkəmizi təmsil edib.
Naxçıvan Muxtar Respublikası Gənclər və İdman Nazirliyinin mətbuat xidmətindən NUHÇIXAN İnformasiya Agentliyinə bildirilib ki, Sosialist Əməyi Qəhrəmanı, Sibirdə nəhəng neft və qaz yataqlarını kəşf etmiş həmyerlimiz Fərman Salmanovun xatirəsinə həsr olunan yarışda 16 ölkədən, ümumilikdə, 139 boksçu iştirak edib.
İdmançımız ilk görüşündə qazaxıstanlı Novruz Şafoyevə qalib gələrək yarımfinala yüksəlib. Növbəti görüşündə rus boksçu Vadim Şeblıkinlə gərgin keçən döyüşdə məğlubiyyətlə üzləşən boksçumuz bürünc medalla kifayətlənib.