Naxçıvanda ilin fəal gəncləri və idmançılar mükafatlandırılıb - VİDEO

Naxçıvan şəhərindəki “Görüş yeri” kafesində 31 Dekabr – Dünya Azərbaycanlılarının Həmrəyliyi Günü və Yeni il münasibətilə muxtar respublikanın ictimai və yaradıcı mühitində fərqlənən istedadlı yeniyetmə və gənclərlə görüş keçirilib, ilin fəalları və uğurlu nəticələr qazanan idmançılar mükafatlandırılıb. 

Gənclər və İdman Nazirliyinin mətbuat xidmətindən NUHÇIXAN İnformasiya Agentliyinə bildirilib ki,  Gənclər və İdman naziri Ramil Hacı mərasimdə Naxçıvan gəncləri üçün cari ilin kifayət qədər uğurlu olduğunu  bildirib.

“Muxtar respublika rəhbərliyi tərəfindən istedadlı gənclərin qiymətləndirilməsi və onlara cəmiyyətin aparıcı sahələrində yüksək etimad göstərilməsi ənənəsi davam etdirildi. Şübhəsiz ki, bu amil Ali Məclis Sədrinin gəncliyə olan qayğısı, rəğbəti və yüksək gözləntilərini əks etdirir”,- deyə nazir bildirib.

Milli Məclisin deputatı, Naxçıvan Muxtar Respublikası Gənclər Fondunun icraçı direktoru Cəbi Quliyev bildirib ki, Gənclər Fondu bu ilin ötən dövrü ərzində həyata keçirilən layihələrdə gənclərin intellektual inkişafını, onların asudə vaxtlarının səmərəli təşkil olunması və müxtəlif layihələrdə birgə iştiraklarını ön plana çəkib.

Çıxışların ardınca mükafatlandırma mərasimi olub. Bu münasibətlə müxtəlif sahələr üzrə fərqlənən 30 nəfər yeniyetmə və gənc təltif olunub. Bayram tədbiri çay süfrəsi ətrafında davam edib, gənclər üçün musiqi nömrələri səsləndirilib.