Naxçıvan şahmatının ən güclüləri yenidən bir arada-"Naxçıvan Premium Turnir" başlayır

Ötən il ölkə şahmat ictimaiyyətində böyük maraqla qarşılanan "Naxçıvan Premium Turnir" bu il ikinci mövsümlə yeni mübarizəyə səhnə olacaq.

Gənclər və İdman Nazirliyinin mətbuat xidmətindən NUHÇIXAN İnformasiya Agentliyinə bildirilib ki, 14-25 yanvar tarixlərini əhatə edəcək turnirin əsas mərhələsində 2021-ci ilin dekabrında keçirilən seçmə mərhələ yarışını adlayan şahmatçılar və ötən mövsümün ilk üçlüyü - qrosmeyster Urfan Sevdimalıyev, beynəlxalq ustalar Pərviz Qasımov və Toğrul Həsənzadə qələbə uğrunda mübarizə aparacaqlar. 

Dairəvi sistem üzrə 11 turdan ibarət yarışda oyun vaxtı 90 dəqiqə + hər gedişə 30 saniyə olmaqla təyin edilib. Turnir cədvəlində xallar bərabər olduğu təqdirdə, "Berqer əmsalı", şəxsi görüşlərin nəticəsi və qələbələrin sayı əsas götürüləcək. Turnirdəki sıralamadan asılı olaraq iştirakçıların hər birinə pul mükafatı təqdim olunacaq. 

Yarış müddətində iştirakçılar Naxçıvan Şahmat Federasiyasının dəstəyi ilə "Təbriz" mehmanxanasında məskunlaşacaqlar. Oyunlar isə Naxçıvan şəhərindəki Gənclik Mərkəzində reallaşacaq. 

Xatırladaq ki, ilk dəfə təşkil olunan "Naxçıvan Premium Turnir"in qalibi Urfan Sevdimalıyev olub.