Beynəlxalq Olimpiya Komitəsi Los-Anceles Yay Olimpiya Oyunlarının müvəqqəti proqramına 28 idman növü daxil edib

Beynəlxalq Olimpiya Komitəsi (BOK) 2028-ci ildə Los-Ancelesdə keçiriləcək Yay Olimpiya Oyunlarının müvəqqəti proqramına 28 idman növünü daxil edib.

NUHÇIXAN İnformasiya Agentliyi xəbər verir ki, bu barədə qərar BOK-un sessiyasında qəbul edilib.

BOK əvvəllər qurumun icraiyyə komitəsinin dəstəyini almış Olimpiya proqramı üzrə komissiyanın təklifi ilə razılaşıb. Tokio Yay Olimpiya Oyunlarında debüt edən skeytbordinq, sörfinq və qayayadırmanma idman növləri 28 idman növünə daxildir.

Boks, ağırlıqqaldırma və müasir pentatlonun proqrama daxil edilməsi sual altında olduğu üçün müvafiq beynəlxalq federasiyalar bu idman növlərini Olimpiya proqramında yerlərini saxlamaq üçün islahatları başa çatdırmalıdırlar.

2023-cü ilədək Oyunların təşkilat komitəsinə proqrama daxil edilməsi üçün əlavə idman növləri təklif edilə bilər. 2024-cü ilin dekabrında isə proqram təsdiqlənəcək.