Lebron Ceyms NBA-da ən çox xal toplayan ikinci basketbolçu olub
ABŞ-ın "Los-Anceles Leykers" klubunun basketbolçusu Lebron Ceyms Milli Basketbol Assosiasiyasının (NBA) tarixinə düşüb.
NUHÇIXAN İnformasiya Agentliyi xəbər verir ki, 38 yaşlı oyunçu buna "Vaşinqton Uizards"a 119:127 hesabı ilə uduzduqları görüşdə nail olub.
Ceyms həmin qarşılaşmada 38 xal toplayıb və karyerasındakı xalların sayını 36 947-yə çatdırıb. O, bu göstəriciyə görə 2004-cü ildə karyerasını bitirmiş Karl Malonu (36 928) geridə qoyaraq ikinci pilləyə yüksəlib.
Birinci sırada 1969 - 1989-cu illərdə oynamış Karim Abdul-Cabbar (38 387) yer alıb.
Qeyd edək ki, Lebron Ceyms 4 qat NBA çempionudur.