UEFA Konfrans Liqası: "Roma" və "Feyenoord" finala yüksəlib
Mayın 5-də Futbol üzrə UEFA Konfrans Liqasında yarımfinal mərhələsinin cavab oyunları keçirilib.
NUHÇIXAN İnformasiya Agentliyi xəbər verir ki, bununla finala vəsiqə qazanan komandalar bəlli olub.
Turnirin favoritlərindən "Roma" İtaliyada İngiltərənin "Lester Siti" klubunu minimal hesabla məğlub edib. Yeganə qolu 11-ci dəqiqədə Temmi Abraham vurub. Lesterdəki ilk qarşılaşmada heç-heçə qeydə alındığından, "canavarlar" iki oyunun nəticəsinə əsasən mərhələ adlayıblar.
Digər cavab oyununda isə Niderlandın "Feyenoord" klubu Fransada "Marsel"lə üz-üzə gəlib. İlk görüşdə 3:2 hesablı qələbə qazanan Rotterdam təmsilçisi səfərdə qolsuz heç-heçəyə nail olaraq, finala yüksəlib.
"Marsel" turnirin pley-off mərhələsində "Qarabağ"ı mübarizədən kənarlaşdırıb.