Dünya çempionu Fransa millisi “Qətər-2022”yə qələbə ilə başlayıb
Qətərdə keçirilən futbol üzrə dünya çempionatının üçüncü gününə yekun vurulub.
NUHÇIXAN İnformasiya Agentliyi xəbər verir ki, turnirin D qrupunda birinci tur çərçivəsində növbəti oyun keçirilib. Belə ki, Fransa millisi Avstraliya yığması ilə qarşılaşıb. Matç Fransa millisinin 4:1 hesablı qələbəsi ilə yekunlaşıb.
Matçda hesabı 9-cu dəqiqədə Kreyq Qudvinin vurduğu qolla Avstraliya millisi açıb. Oyunun 27-ci dəqiqəsində Adrian Rabyo tarazlığı bərpa edib, 32-ci dəqiqədə Olivye Jiru fransalıları hesabda önə keçirib. Qarşılaşmanın 68-ci dəqiqəsində Kilian Mbappe 3-cü dəfə rəqibi meydanın mərkəzinə dəvət edib. Son nöqtəni isə 71-ci dəqiqədə Jiru qoyub.
Bu nəticədən sonra son dünya çempionu 3 xalla turnir cədvəlinə başçılıq edir. Danimarka və Tunis hərəyə 1 xalla 2-3-cü yerləri bölüşdürür. Xalı olmayan Avstraliya isə sonuncu sırada qərarlaşıb.
Üçüncü oyun günündə C qrupunda Argentina Səudiyyə Ərəbistanı ilə qarşılaşıb və gözlənilməz halda 1:2 hesabı ilə uduzub. Eyni qrupda "Stadium 974"də oynanılan matçda Meksika Polşa ilə üz-üzə gəlib. Oyunda qapılara qol vurulmayıb. Polşa millisinin kapitanı Robert Levandovski matçın 58-ci dəqiqəsində penaltidən yararlana bilməyib. Meksikalı qapıçı Gilyermo Oçoa Levandovskinin zərbəsini dəf edib. D qrupu çərçivəsində isə Danimarka - Tunis matçı oynanılıb. Görüş qolsuz bərabərliklə başa çatıb.
Qeyd edək ki, “Qətər-2022” dekabrın 18-də yekunlaşacaq.