Zlatan İbrahimoviç Azərbaycan millisi ilə oyuna çağırıla bilər
Zlatan İbrahimoviç AVRO-2024-ün seçmə mərhələsində Belçika və Azərbaycan milliləri ilə oyun üçün İsveç yığmasına çağırıla bilər.
NUHÇIXAN İnformasiya Agentliyi yerli mətbuata istinadən xəbər verir ki, bunu komandanın baş məşqçisi Yanne Andersson istisna etməyib.
O bildirib ki, sonuncu dəfə 2022-ci il martın 29-da Polşaya (0:2) qarşı DÇ-2022-nin seçmə mərhələ görüşündə iştirak edən 42 yaşlı futbolçunu bir illik fasilədən sonra milliyə qaytarmağı düşünür: “Zlatan nə zaman sağlamdırsa, hətta meydana çıxmasa belə, öhdəlik və liderlik baxımından göstərdiyi təsirlə bizə çox şey verə bilər”.
İbrahimoviç milli karyerasında ilk rəsmi oyununu 2001-ci il oktyabrın 7-də Azərbaycan yığmasına qarşı keçirib. İsveç seçməsinin 3:0 hesabı ilə qalib gəldiyi həmin görüşdə futbolçu yığmada ilk qolunu vurub.
Qeyd edək ki, İsveç yığması martın 24-də Belçika, üç gün sonra isə Azərbaycan millisini Solnada qəbul edəcək.