Erlinq Haaland “Mançester Siti”nin tarixinə düşüb
“Mançester Siti”nin hücumçusu Erlinq Haaland UEFA Çempionlar Liqasının səkkizdəbir final mərhələsində "Leyptsiq"lə oyunda (7:0) penta-trik etməklə rekordlar qırıb.
NUHÇIXAN İnformasiya Agentliyi xəbər verir ki, norveçli forvard mövsüm ərzində vurduğu qolların sayını 39-a çatdırıb. Bununla da o, Mançester təmsilçisinin heyətində bir mövsümdə ən çox qol vuran futbolçu olub.
Haaland 1928-1929-cu il mövsümündə 38 dəfə rəqib qapılarına yol tapan Tommi Consonun rekordunu yeniləyib.
"Opta"nın məlumatına görə, Haaland, həmçinin Çempionlar Liqasında 30-dan çox qol vurmağı bacaran ən gənc futbolçu olub. O, buna 22 yaş 236 günlüyündə nail olub.