Sabitlik və beynəlxalq əməkdaşlığa çağırış
Azərbaycan Respublikasının Prezidenti İlham Əliyevin “Əl-Ərəbiyyə” telekanalına verdiyi müsahibə, ölkəmizin həm regional, həm də qlobal miqyasda həyata keçirdiyi siyasətin prioritetlərini anlamaq baxımından xüsusi əhəmiyyət kəsb edir. Müsahibədə dövlət başçısı Azərbaycanın xarici və daxili siyasətinin müxtəlif istiqamətlərinə toxunaraq, milli maraqlara əsaslanan, eyni zamanda beynəlxalq əməkdaşlığa açıq olan mövqeyini aydın şəkildə ifadə etmişdir.
Prezident İlham Əliyev müsahibəsində Azərbaycanın regional təhlükəsizlik məsələlərində oynadığı rolu xüsusi vurğulamışdır. Dövlət başçısı qeyd edir ki, “Cənubi Qafqazda sülhün və sabitliyin təmin olunması Azərbaycanın əsas prioritetlərindən biridir”. Bu yanaşma həm ölkənin milli maraqlarını qorumaq, həm də regionda uzunmüddətli dayanıqlı inkişafı təmin etmək məqsədlərinə xidmət edir. Azərbaycan Respublikasının Prezidenti İlham Əliyevin müsahibəsində diqqət çəkilən əsas mövzulardan biri də 2020-ci il Vətən müharibəsindən sonra yaranmış yeni geosiyasi reallıqlar olmuşdur. Prezident İlham Əliyev vurğulamışdır ki, “Azərbaycan öz ərazi bütövlüyünü bərpa etməklə beynəlxalq hüququn norma və prinsiplərinə əsaslanan ədaləti təmin etmişdir”. Bu məqam Azərbaycanın gələcək inkişaf strategiyasında mühüm rol oynayır, çünki suverenliyin bərpası dövlətin müstəqilliyini möhkəmləndirən əsas amillərdəndir.
Prezident İlham Əliyev müsahibəsində Azərbaycanın xarici siyasətinin çoxşaxəli xarakter daşıdığını bildirmişdir. Onun sözləri ilə desək, “Azərbaycan balanslaşdırılmış siyasət apararaq həm region ölkələri, həm də qlobal güclərlə münasibətlərini bərabərlik və qarşılıqlı hörmət əsasında qurur”. Bu yanaşma ölkəmizin beynəlxalq aləmdə etibarlı tərəfdaş kimi tanınmasına zəmin yaradır. Nəticədə Azərbaycan Avropanın enerji təhlükəsizliyinin təmin olunmasında aparıcı fiqurlardan birinə çevrilməkdədir. Azərbaycanın enerji siyasəti müsahibədə xüsusi yer tutmuşdur. İlham Əliyev xüsusilə vurğulayır ki, Azərbaycan Avropanın enerji təhlükəsizliyində mühüm rol oynayır və bu istiqamətdə əməkdaşlıq getdikcə genişlənir. Son illərdə Azərbaycanın aparıcı olduğu nəhəng enerji layihələrinin xəritəsi də, əhatə dairəsi də, bu istiqamətdə qeydə alınan rəqəmlər də Azərbaycanın dünyanın enerji diplomatiyasında artan rolunu daha aydın göstərir. Belə ki,
• 2023-cü ildə Azərbaycan Avropaya 11,8 milyard kubmetr qaz ixrac etmiş, Türkiyəyə 5,6 milyard kubmetr, Gürcüstana isə 2,5 milyard kubmetr qaz tədarük olunmuşdur.
• Ümumilikdə 2023-cü ildə ölkədə qaz hasilatı 48,3 milyard kubmetr, ixrac isə 23,8 milyard kubmetr təşkil etmişdir.
• “Şahdəniz” yatağından 2023-cü ildə 26,2 milyard kubmetr qaz hasil olunmuş, istismara başlanıldığından bəri isə ümumilikdə 148,1 milyard kubmetr qaz çıxarılmışdır.
• Azərbaycanın təsdiq edilmiş qaz ehtiyatları 2,6 trilyon kubmetr təşkil edir ki, bu da ən azı 100 il ərzində hasilat üçün kifayət edəcəkdir.
• Əsas ixrac marşrutları Cənub Qaz Dəhlizi, TANAP və TAP layihələridir.
Bu göstəricilər Azərbaycanın təkcə xammal ixracatçısı deyil, həm də Avropanın enerji təhlükəsizliyinin mühüm tərkib hissəsinə çevrildiyini nümayiş etdirir.
Azərbaycanın geostrateji mövqeyi ölkəni həm enerji, həm də nəqliyyat dəhlizlərinin əsas mərkəzinə çevirir. Cənub Qaz Dəhlizi vasitəsilə Avropaya enerji təchizatı, Bakı-Tbilisi-Qars dəmir yolu və liman infrastrukturu sayəsində isə Şərq-Qərb və Şimal-Cənub istiqamətində nəqliyyat əməkdaşlığı həyata keçirilir. Bununla yanaşı, Azərbaycanın təşəbbüsü ilə Zəngəzur dəhlizinin açılması Asiya ilə Avropanı birləşdirəcək yeni nəqliyyat körpüsünün yaradılmasına xidmət edəcək.
Azərbaycan Respublikası Prezidenti İlham Əliyev müsahibəsində Azərbaycanın sülh gündəliyinin beynəlxalq müstəvidə dəstəkləndiyini vurğulamışdır. Bu kontekstdə Vaşinqtonda keçirilmiş görüşlər regionda sülhün bərqərar olması üçün mühüm əhəmiyyət kəsb edir. Görüşlər zamanı Zəngəzur dəhlizinin açılması məsələsinə də toxunulmuşdur ki, bu da həm Azərbaycanın Naxçıvanla birbaşa əlaqəsini təmin edəcək, həm də Avropa-Asiya ticarət və enerji əməkdaşlığı üçün yeni imkanlar yaradacaq. Analitik baxımdan, Vaşinqton dialoqu regionun yeni geosiyasi düzəninin formalaşmasına, Azərbaycanı isə bu prosesin əsas iştirakçılarından birinə çevirməyə xidmət edir.
Prezident İlham Əliyev daxili siyasətlə bağlı qeyd etmişdir ki, “Azərbaycan iqtisadiyyatı şaxələndirmə siyasəti sayəsində qeyri-neft sektorunda davamlı artım əldə etmişdir”. Bu, ölkənin iqtisadi müstəqilliyini möhkəmləndirən əsas amillərdəndir. Sosial rifahın yaxşılaşdırılması, iş yerlərinin yaradılması və infrastruktur layihələrinin genişləndirilməsi Azərbaycanın daxili siyasətində prioritet olaraq qalır.
Beləliklə, Prezident İlham Əliyevin “Əl-Ərəbiyyə” telekanalına müsahibəsi Azərbaycanın daxili və xarici siyasətindəki strateji prioritetlərin aydın şəkildə ifadə olunduğunu göstərir. Müsahibədə səsləndirilən fikirlər ölkəmizin regional və qlobal miqyasda artan rolunu, milli maraqlara əsaslanan siyasətini və gələcəyə yönəlmiş vizyonunu nümayiş etdirir. Azərbaycanın inkişaf modeli sabitlik, müstəqillik və əməkdaşlıq prinsiplərinə əsaslanır və bu da ölkəmizin gələcək perspektivlərinin möhkəm təməl üzərində qurulduğunu təsdiqləyir.
Əli Həşimov
Ali Məclisinin deputatı