Rumıniya mətbuatı: Azərbaycan Aİ-nin enerji təhlükəsizliyi strategiyasının əsas hissəsidir
Avropa İttifaqının enerji qurumları son dövrlərdə Avropa bazarına daxil olan Azərbaycan təbii qazının həcmi, mənşəyi və texniki parametrləri üzrə daha detallı monitorinq mexanizmləri tətbiq edir. Rumıniya mətbuatında dərc olunan materiallarda bu nəzarət prosedurlarının səbəbləri və enerji təhlükəsizliyi kontekstində əhəmiyyəti geniş şəkildə şərh olunur.
NUHÇIXAN xəbər verir ki, Avropa Komissiyası qaz tədarükü üzrə şəffaflığın artırılması və mənşə ölkəsinin dəqiq təsdiqlənməsi məqsədilə idxal olunan hər partiya üzrə sənədləşmə və texniki analiz prosedurlarını gücləndirib.
Bu addım xüsusilə Rusiya qazından asılılığın mərhələli şəkildə azaldılması strategiyası ilə əlaqələndirilir. Avropa İttifaqı yeni qaydalara əsasən, birlik ərazisinə daxil olan qazın mənşəyinin dəqiq sənədlərlə təsdiq edilməsini tələb edir. Azərbaycan qazı Avropaya əsasən, Cənub Qaz Dəhlizi vasitəsilə, o cümlədən Trans-Adriatik Boru Kəməri xətti ilə nəql olunur. Mövcud infrastrukturun ötürmə gücü məhdud olduğundan, bəzi hallarda alternativ marşrutlardan, o cümlədən Trans-Balkan xəttindən də istifadə edilir. Bu isə Avropa qurumlarının tranzit və mənşə üzrə əlavə texniki yoxlamalar aparmasını zəruri edir.
Ekspertlərin fikrincə, Brüsselin hər metr kub qaz üzrə apardığı analizlər Azərbaycanın enerji tərəfdaşı kimi roluna şübhə ilə yanaşmaq deyil, əksinə, ümumi Avropa enerji bazarında vahid və sərt standartların tətbiqi siyasətinin tərkib hissəsidir. Bu prosedurlar qazın fiziki parametrlərinin, keyfiyyət göstəricilərinin və mənşə sənədlərinin uyğunluğunu təsdiqləməyə yönəlib.
Qeyd olunur ki, Avropa İttifaqı enerji təhlükəsizliyini yalnız tədarükün həcmi ilə deyil, həm də şəffaflıq və hüquqi uyğunluq meyarları ilə qiymətləndirir. Bu kontekstdə Azərbaycan Avropa bazarı üçün mühüm və etibarlı tərəfdaş kimi qalır və qaz tədarükünün artırılması perspektivləri müzakirə olunur.
Beləliklə, Brüsselin Azərbaycan qazına münasibətdə tətbiq etdiyi detallı analiz mexanizmi Avropa İttifaqının enerji təhlükəsizliyi strategiyasının və idxal olunan resurslar üzrə vahid nəzarət sisteminin tərkib hissəsi kimi dəyərləndirilir.