Geosiyasi risklər qızılın qiymətini artırıb
Yaxın Şərqdə münaqişənin genişlənməsi ilə bağlı artan qeyri-müəyyənlik fonunda investorların təhlükəsiz aktivlərə yönəlməsi nəticəsində qızılın qiyməti bahalaşıb.
NUHÇIXAN xəbər verir ki, martın 6-da Nyu-Yorkun COMEX əmtəə birjasında qızılın bir troya unsiyasının qiyməti 49,3 dollar artaraq 5 128,2 dollara çatıb.
ABŞ dollarının zəifləməsi digər valyutalara sahib investorlar üçün dollarla qiymətləndirilən qızılı daha əlçatan edib.
Analitiklərin sözlərinə görə, geosiyasi risklər azalmır və hətta gərginliyin daha da artması ehtimalı var. Qeyd olunub ki, İranın xarici işlər nazirinin son müsahibəsində İran qüvvələrinin ABŞ və ya İsrail tərəfindən mümkün quru əməliyyatına hazır olduğunu bildirməsi qızılın qiymətinin artımına təsir edən amillərdən biridir. Ənənəvi olaraq təhlükəsiz investisiya aləti sayılan qızıl geosiyasi və iqtisadi qeyri-müəyyənlik fonunda ilin əvvəlindən indiyədək təxminən 18 faiz bahalaşaraq ardıcıl rekord səviyyələrə çatıb.
Analitiklərin fikrincə, qızılın qiyməti yaxın müddətdə dəyişkən qalacaq. Ancaq 5280 dollarlıq səviyyə aşılacağı təqdirdə qiymətlərin 5448 dollara qədər yüksəlməsi mümkündür.
Bu həftə Hindistanda fiziki qızıla tələbat qiymətlərin kəskin dəyişməsi səbəbindən azalıb. Çində isə investisiya tələbinin artması fonunda tətbiq olunan əlavə qiymət sabit qalıb. İnvestorlar indi ABŞ-də fevral ayı üzrə məşğulluq hesabatının açıqlanmasını gözləyirlər.
Digər qiymətli metallarda da qiymətlər artıb. Belə ki, gümüş 2,4 faiz bahalaşaraq bir unsiya üçün 83,89 dollar olub. Platin 1,4 faiz bahalaşaraq 2 150,70 dollara yüksəlib, palladium isə 2 faiz bahalaşaraq 1 662,72 dollara çatıb.