Qızılın qiyməti həftə ərzində 3 faizdən çox ucuzlaşıb
ABŞ və İran arasında sülh danışıqlarının dayanması, neftin bahalaşmasının inflyasiya və faiz dərəcələri ilə bağlı narahatlıqları artırması fonunda həftə ərzində birjalarda qızılın qiymətindəki azalma tendensiyası davam edib.
NUHÇIXAN xəbər verir ki, ardıcıl 4 həftəlik artım dinamikasından sonra qızılın qiyməti həftənin əvvəlindən bəri 3 faiz dəyər itirib. Hazırda qızılın bir troya unsiyasının qiyməti 4600 dollar civarındadır.
Analitiklərin fikrincə, qızılın qiyməti hələ də üfüqi zolaqda qalır və hazırda hər şey Yaxın Şərqdə baş verən proseslərdən asılıdır. Hörmüz boğazının uzun müddət bağlı qalması riski neft qiymətlərini yüksək saxlayacaq və qızıla təzyiq göstərəcək. Neft qiymətlərinin yüksəlməsi nəqliyyat və istehsal xərclərini artırmaqla inflyasiyanı artıra bilər ki, bu da öz növbəsində faiz dərəcələrinin yüksəlmə ehtimalını artırır. Qızıl ümumiyyətlə inflyasiyaya qarşı bir hedcinq kimi qəbul edilsə də, daha yüksək faiz dərəcələri gəlir gətirən aktivləri daha cəlbedici edir və qızılın cəlbediciliyini azaldır.
Qeyd edək ki, qızılın qiyməti mart ayında 2008-ci ildəki qlobal maliyyə böhranından bəri ən pis aylıq göstərici nümayiş etdirib. Yaxın Şərqdəki münaqişə başlayandan indiyədək qızılın qiyməti təxminən 8 faiz ucuzlaşıb, aprelin 13-dən bəri isə ən aşağı səviyyəyə düşüb.
ABŞ-nin qabaqcıl investisiya banklarından olan “Goldman Sachs” və “Citigroup”un analitikləri qızılın bir troya unsiyasının qiymətinin 5000-5400 dollara yüksələcəyini proqnozlaşdırırdılar.