Sofi Naue: Süni intellekt vasitəsilə qeyri-rəsmi məskənlərin xəritəyə salınması sürətlənir

Müasir süni intellekt texnologiyaları və peyk məlumatları qeyri-rəsmi şəhər yaşayış məskənlərinin xəritəyə salınmasını ayrı-ayrı binalar səviyyəsinə qədər əhəmiyyətli dərəcədə sürətləndirməyə və detallandırmağa imkan verir.

NUHÇIXAN xəbər verir ki, bu barədə "UNITAC-Hamburg"un şəhər innovasiyaları üzrə mütəxəssisi Sofi Naue (Sophie Naue) Bakıda WUF13 çərçivəsində keçirilən "Qeyri-rəsmi yaşayış məntəqələrinin transformasiyası" tədbirində bildirib.

Onun sözlərinə görə, "UNITAC-Hamburg"un işi çərçivəsində qeyri-rəsmi yaşayış məntəqələrində damların və bina konturlarının müəyyən edilməsi üçün maşın öyrənməsindən istifadə edən BEAM aləti (binaların və qurğuların xəritəyə salınması üçün avtomatlaşdırılmış sistem) işlənib hazırlanıb.

"Sistem yüksək dəqiqlikli aerokosmik şəkillərdən və peyk təsvirlərindən istifadə edərək, qeyri-rəsmi yaşayış məntəqələrinin inkişafını və dinamikasını ayrı-ayrı tikililər səviyyəsində təhlil etməyə imkan verir", - o bildirib.

Naue vurğulayıb ki, əvvəllər əl ilə yerinə yetirilən və aylarla vaxt apara bilən proseslərin avtomatlaşdırılması həyata keçirilir. Onun sözlərinə görə, texnologiya artıq Cənubi Afrikadakı Durban və Keyptaun da daxil olmaqla bir sıra şəhərlərdə, eləcə də Mərkəzi Amerika ölkələrində və Namibiyada tətbiq edilib.