Qlobal LNG tədarükünün cari ildə sabit qalacağı gözlənilir
Bu il Yaxın Şərqdən mayeləşdirilmiş təbii qaz (LNG) ixracının kəskin azalmasına baxmayaraq, digər regionlarda istehsalın artması hesabına qlobal LNG) tədarükünün ümumilikdə sabit qalacağı proqnozlaşdırılır.
NUHÇIXAN Beynəlxalq Enerji Agentliyinin hesabatına istinadla xəbər verir ki, yeni layihələrin işə düşməsi qlobal qaz bazarında yaranan itkilərin böyük hissəsini kompensasiya edəcək.
Hesabatda bildirilir ki, proqnozlara əsasən, 2026-cı ildə Qətər və Birləşmiş Ərəb Əmirliklərinin birlikdə illik LNG təchizatı 2025-ci illə müqayisədə təxminən 45 faiz və ya 54 milyard kubmetr azalacaq. Bununla belə, mart-iyun aylarında olduğu kimi, bu itkilərin Yaxın Şərqdən kənar LNG istehsalındakı əhəmiyyətli artımla böyük ölçüdə kompensasiya olunacağı gözlənilir.
IEA-nın məlumatına görə, Şimali Amerika, Afrika və Avstraliyada həyata keçirilən yeni layihələr 2026-cı ildə qlobal LNG balansına təxminən 50 milyard kubmetr əlavə tədarük təmin edə bilər. Bundan əlavə, mövcud layihələrdə xammal qaz təchizatının yaxşılaşması fonunda əlavə olaraq 10 milyard kubmetrdən çox LNG istehsalı gözlənilir.
Nəticədə, 2026-cı ildə qlobal LNG ticarətinin ötən illə müqayisədə əsasən sabit qalacağı proqnozlaşdırılır.