İyunda qlobal neft tədarükü sutkada 4,1 milyon barel artıb

İyunda qlobal neft tədarükü əvvəlki aya nisbətən təxminən 4 milyon 100 min barel artaraq gündəlik 98 milyon 760 min barel olub.

NUHÇIXAN xəbər verir ki, bu barədə Beynəlxalq Enerji Agentliyinin (IEA) neft bazarına dair aylıq hesabatında deyilir.

Bildirilir ki, buna səbəb Hörmüz boğazından neft axınının və Körfəzdə hasilatın qismən bərpasıdır. İyunda təklifin artmasına baxmayaraq, qlobal neft istehsalı Yaxın Şərqdəki müharibədən əvvəlki səviyyələrdən gündəlik təxminən 9,4 milyon barel aşağı qalıb.

ABŞ və İran arasında əldə edilən razılaşmadan sonra Körfəz ölkələri istehsalı qismən bərpa etdikcə, iyunda Körfəzdən neft təchizatı əvvəlki aya nisbətən gündəlik təxminən 3,5 milyon barel artıb. Lakin təhlükəsizliklə bağlı narahatlıqlar və ABŞ Hərbi Dəniz Qüvvələrinin müşayiətinə ehtiyac səbəbindən Hörmüz boğazından neft axını bəzən kəsilib və regional neft təchizatı müharibədən əvvəlki səviyyələrdən gündəlik təxminən 11,4 milyon barel aşağı düşüb.

Hesabat dövründə Neft İxrac Edən Ölkələr Təşkilatı (OPEC) və bəzi qeyri-OPEC istehsalçılarını əhatə edən OPEC+ qrupunun hasilatı gündəlik təxminən 2,45 milyon barel artaraq 38 milyon 390 min barelə çatıb. Bu artımın əsas hissəsi Səudiyyə Ərəbistanı (gündəlik təxminən 900 min barel) və Küveyt (gündəlik təxminən 630 min barel) tərəfindən təmin edilib. OPEC-ə üzv olmayan ölkələrin tədarükü isə sutkada təxminən 1,63 milyon barel artaraq 60 milyon 370 min barelə çatıb ki, bu artımın yarıdan çoxu (gündə təxminən 940 min barel) Birləşmiş Ərəb Əmirliklərinin payına düşüb.

Hörmüz boğazından neft tranzitinin həcmi artmağa davam edərsə, bu il qlobal neft tədarükünün gündəlik orta hesabla 102 milyon 600 min barel olacağı gözlənilir. Bu səviyyə ötən illə müqayisədə gündəlik təxminən 3,7 milyon barel azalmadır. Lakin ötən ay dərc edilmiş hesabatdakı proqnozla müqayisədə gündəlik 210 min barel artım deməkdir.

Hesabatda Hörmüz boğazının idarə olunması ilə bağlı davam edən danışıqlar və hücumların davam etməsi səbəbindən bu proqnoza risklərin davam etdiyi bildirilir. Qlobal neft tədarükünün 2027-ci ildə təxminən 7,5 milyon barel artaraq sutkada 110 milyon 100 min barelə çatacağı gözlənilir.