Qızılın qiyməti 4200 dolları ötüb
ABŞ və İran arasında sülh sazişinin imzalanacağına dair gözləntilərin inflyasiya narahatlıqlarını qismən aradan qaldırması fonunda qızılın qiyməti bahalaşır.
NUHÇIXAN xəbər verir ki, hazırda Nyu-Yorkun COMEX əmtəə birjasında qızılın bir troya unsiyasının qiyməti 4201 dollar civarındadır. Gün ərzində qızılın qiyməti 4 faizdən çox artıb. Gümüşün qiyməti isə 3 faizdən çox bahalaşaraq iyulun 7-dən bəri ən yüksək səviyyəyə çatıb. Gümüşün bir troya unsiyasının qiyməti hazırda 62 dollardır.
Platin və palladiumun qiymətləri də artıb. ABŞ-də mis fyuçersləri tarixi rekorda yaxınlaşıb. “Comex” birjasında ticarət edilən mis qiymətləri bu il 17 faizdən çox bahalaşıb. Ötən gün London Metal Birjasında isə mis qiymətləri 1,4 faiz artaraq may ayından bəri ən yüksək səviyyəyə çatıb.
Ekspertlərin fikrincə, Hörmüz boğazının yenidən açılması üçün müvəqqəti razılaşma ehtimalı inflyasiya proqnozu ilə bağlı narahatlıqları aradan qaldırdığı və ABŞ Federal Ehtiyat Sisteminin faiz dərəcələrini artırma ehtimalını azaltdığı üçün qızılın qiyməti ardıcıl üçüncü gündür yüksəlir.
“Citigroup”un analitikləri qızılın qiymətinin növbəti ay ərzində sabit qalacağını və ya bir qədər azalacağını, ilin dördüncü rübündə 4500 dollara, gələn ilin birinci yarısında isə 5000 dollara yüksələcəyini proqnozlaşdırırlar.
“J.P. Morgan” bankının analitikləri isə hesab edirlər ki, əsas sektorlardan qızıla tələbat əvvəllər proqnozlaşdırıldığı qədər güclü olmayacaq. Bank cari ilin üçüncü rübündə qızılın qiymətinin 4300 dollar, dördüncü rübdə isə 4500 dollar olacağını proqnozlaşdırır. “J.P. Morgan” mərkəzi bankların alışlarının və fiziki tələbin 2027-ci ildə qızılın qiymətini dəstəkləməyə davam edəcəyini gözləyir.
Qeyd edək ki, iyulda qızılın qiyməti son 5 ayda ilk dəfə aylıq artım tempi nümayiş etdirib. Qızılın qiyməti ötən həftə ərzində 0,6 faiz artım göstərib, iyul ayında isə təxminən 1,7 faiz bahalaşıb.
Qızıl ənənəvi olaraq inflyasiyaya qarşı hedcinq kimi qəbul edilsə də, yüksək faiz dərəcəsi mühitində cəlbediciliyini itirir, çünki heç bir gəlir gətirmir. Dollar indeksi bir ildən çox müddət ərzində ən yüksək səviyyəsinə yüksəlib və bu da qızılı beynəlxalq alıcılar üçün daha bahalı edir.