Azərbaycanla Türkiyənin elektron imzalarının qarşılıqlı tanınmasına dair müzakirələr aparılıb

128

Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinin direktoru Elnar Əsədovun rəhbərlik etdiyi nümayəndə heyəti Türkiyədə səfərdə olub. Nümayəndə heyəti Türkiyənin Nəqliyyat, Dənizçilik və Rabitə Nazirliyi, İnformasiya Texnologiyaları və Rabitə Agentliyi, eləcə də Türkiyə Elmi və Texnoloji Tədqiqat Şurasında görüşlər keçirib.

Nazirlikdən NUHÇIXAN-a bildirilib ki, görüşlərdə texniki məsələlər və elektron imzaların qarşılıqlı tanınması istiqamətində mexanizmlər müzakirə olunub. Elektron imzanın tətbiqi, həmçinin ölkələrin bu infrastrukturu qarşılıqlı tanıması istiqamətində fikir mübadiləsi aparılıb.

Elektron imza sisteminin qarşılıqlı tanınması Azərbaycan və Türkiyə arasında gömrük sahəsində bütün sənədlərin elektron formada imzalanaraq göndərilməsini mümkün edəcək. Bu da keçid məntəqələrində növbələrin azalmasına, sənədlərin saxtalaşdırılması riskinin aradan qaldırılmasına, vətəndaş-məmur təmasının minimuma endirilməsinə imkan verəcək.

Qeyd edək ki, hazırda Türkiyə ilə paralel olaraq Avropa ölkələri arasında elektron imzaların qarşılıqlı tanınması istiqamətində işlər aparılır.

Nümayəndə heyəti, həmçinin İstanbul Konqres mərkəzində keçirilmiş Beynəlxalq Blokçeyn Konfransında iştirak edib. Konfransın builki mövzusu “Rəqəmsal ID” olub. İştirakçılar “E-ID”nin blokçeyn texnologiyasında tətbiqini müzakirə edərək bu texnologiyanın insanların həyatını necə dəyişdirə biləcəyi, eləcə də iqtisadiyyatın rəqəmsallaşması prosesinə təsiri haqqında danışıblar.

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: