Dövlət ailə təsərrüfatlarına maliyyə dəstəyi göstərir
Naxçıvan Muxtar Respublikası İqtisadiyyat Nazirliyinin mətbuat xidmətindən NUHÇIXAN-a verilən məlumata görə, bu ilin 9 ayı ərzində Sahibkarlığın İnkişafı Fonduna sahibkarlar və ya təsərrüfat subyektləri tərəfindən 220 müraciət daxil olub. Daxil olmuş müraciətlər üzrə monitorinqlər aparılıb, iqtisadi cəhətdən səmərəli hesab edilən müxtəlif təyinatlı prioritet layihələrlə bağlı sahibkarlıq subyektlərinə və ailə təsərrüfatlarına biznes planların və digər zəruri sənədlərin hazırlanması istiqamətində köməkliklər göstərilib. Nəticədə 2019-cu il yanvarın 1-dən sentyabrın 1-dək Fondun vəsaitləri hesabına müvəkkil kredit təşkilatı vasitəsilə 58 layihənin maliyyələşdirilməsinə 6 milyon 458 min 700 manatdan çox kreditlər verilib.
Bundan sənaye yönümlü 6 layihənin maliyyələşdirilməsinə 5 milyon 523 min manat;
-kənd təsərrüfatı məhsulları istehsalı, o cümlədən heyvandarlıq, arıçılıq, quşçuluq sahələrinin, meyvə-tərəvəz məhsullarının konservləşdirilməsi, soyuducu anbarın yaradılması, müxtəlif çeşiddə meyvə araqlarının və meyvə qurusunun qablaşdırılması, süd məhsullarının emalı, yabanı növ bitkilərin tədarükü və qablaşdırılması, damazlıq arı təsərrüfatının və balın emalı sahələrinin yaradılması, qovurmanın qablaşdırılmasının təşkili, dondurma istehsalı və satışı sahəsinin yaradılması məqsədilə 50 layihənin maliyyələşdirilməsinə 922 min 700 manat;
-xidmət yönümlü 2 layihə üzrə 13 min manat həcmində vəsait yönəldilib.
İqtisadiyyatın mühüm istiqamətlərindən biri də ailə təsərrüfatlarının formalaşması və gələcəkdə kiçik və orta sahibkarlıq subyektlərinə çevrilməsidir. Son dövrlərdə dövlət tərəfindən bu fəaliyyət sahəsinin stimullaşdırılması ilə bağlı atılan addımlar muxtar respublikada ailə təsərrüfatlarının artmasına şərait yaradıb. 2019-cu ilin muxtar respublikada “Ailə təsərrüfatları ili” elan olunmasını, ailə təsərrüfatlarının iqtisadi inkişafdakı rolunu nəzərə alaraq onların fəaliyyətlərinin stimullaşdırılması, genişləndirilməsi üçün güzəştli kreditlərin verilməsi davam etdirilib.
Belə ki, 2019-cu ilin yanvar-sentyabr ayları ərzində Sahibkarlığın İnkişafı Fondu tərəfindən maliyyələşdirilmiş layihələrdən heyvandarlıq, quşçuluq, arıçılıq təsərüfatı, meyvə-tərəvəz məhsullarının konservləşdirilməsi, yabanı növ bitkilərin tədarükü, qablaşdırılması, süd məhsullarının emalı və qablaşdırılması, unlu-qənnadı məmulatların paketlənməsi üçün xammalın və taranın alınması, qovurmanın qablaşdırılması məqsədilə 39 ailə təsərrüfatına 381 min 400 manat həcmində dövlət maliyyə dəstəyi göstərilib.
Bu istiqamətdə tədbirlər ötən dövr ərzində davam etdirilib, 38-dən çox ailə təsərrüfatına kreditlərin verilməsi üçün müvafiq tədbirlər həyata keçirilib.
Sahibkarlara, ailə təsərrüfatlarına güzəştli şərtlərlə kreditlərin verilməsi, istehsal olunmuş məhsulların satışı üçün əlverişli şəraitin yaradılması muxtar respublikada ailə təsərrüfatlarının inkişafına hərtərəfli şərait yaradılıb.