“Made in Uzbekistan Online” biznes forumu keçiriləcək
İyunun 9-12-də Azərbaycan sahibkarları ilə Özbəkistanın ixracatçı təşkilatları arasında onlayn formatlı biznes forum keçiriləcək. Forum Özbəkistanın ölkəmizdəki səfirliyi və Özbəkistan Respublikası İnvestisiya və Xarici Ticarət Nazirliyinin İxracın təşviqi agentliyi ilə birlikdə, Azərbaycanda İxracın və İnvestisiyaların Təşviqi Fondu (AZPROMO), Kiçik və Orta Biznesin İnkişafı Agentliyi (KOBİA) və “Caspian Event Organisers” (CEO) şirkəti tərəfindən təşkil olunur.
“Caspian Event Organisers” şirkətindən NUHÇIXAN İnformasiya Agentliyinə bildirilib ki, ilk dəfə təşkil edilən “Made in Uzbekistan Online” biznes forumu Özbəkistanın məhsulları ilə tanış olmaq, eləcə də azərbaycanlı və özbək sahibkarlar arasında yeni biznes əlaqələri qurmaq üçün səmərəli işgüzar platformadır.
Forum yeni tip COVID-19 pandemiyasının iqtisadiyyatın müxtəlif sahələrinə təsirini yüngülləşdirməyə kömək etməklə yanaşı, istər Azərbaycanda, istərsə də Özbəkistanda pandemiya şəraitində biznesə dəstək vasitəsi funksiyasını yerinə yetirəcək. Sözügedən biznes forumda Özbəkistanın ixracyönümlü məhsullarının 57 istehsalçısının, eləcə də Azərbaycanın 60-dan çox sahibkarının iştirakı gözlənilir.
Hər iki ölkənin nazirlik, agentlik və şirkətlərini təmsil edən nümayəndələrin iştirak edəcəkləri forumun plenar sessiyasının rəsmi açılışı iyunun 8-nə planlaşdırılır. Açılış “YouTube” platformasında yayımlanacaq.
Biznes-forumun proqramına iqtisadiyyatın aşağıdakı sahələri üzrə görüşlər daxildir:
- qida sənayesi və kənd təsərrüfatı - 9 iyun;
- maşınqayırma və dağ-mədən sənayesi - 10 iyun;
- yüngül sənaye - 11 iyun;
- elektrotexnika - 12 iyun.
Forumda iştirak etmək istəyən şəxslər aşağıdakı link vasitəsilə qeydiyyatdan keçə bilərlər: https://b2b.ceo.az/welcome.htm