Bakı-Tbilisi-Qars dəmir yolu xətti ilə Türkmənistandan Türkiyəyə propilen daşıyan konteyner qatarı Mersinə çatıb
Türkmənistanda istehsal olunan propilenin növbəti partiyası Bakı-Tbilisi-Qars dəmir yolu xətti ilə Türkiyəyə çatdırılıb.
“ADY Konteyner”dən NUHÇIXAN İnformasiya Agentliyinə bildirilib ki, propilenin yükləndiyi 40 konteynerdən ibarət blok qatarın “Türkmənbaşı-Mersin” marşrutu üzrə operatoru Azərbaycanın “ADY Konteyner”, “Gürcüstanın GR Logistics” və Türkiyənin “Pasifik Eurasia Lojistik” şirkətləridir.
40 və 45 futluq konteynerlər Türkmənbaşı limanından Bakıya operatoru “Azərbaycan Dəmir Yolları” QSC-nin törəmə şirkəti olan “ADY Konteyner” olan “Balkan” fider gəmisi ilə çatdırılıb. Konteynerlər Ələt Limanında aşırıldıqdan sonra, platformalara yüklənərək Türkiyəyə yola salınıb.
Bu Türkmənistan propilenini Türkiyəyə daşıyan üçüncü konteyner blok qatarıdır. Digər blok qatarlar da hər biri 40 və 45 futluq olmaqla 40 konteynerdən ibarət olub.