Əhmədiyyə Cəbrayılovun 100 illiyi münasibətilə poçt markası buraxılıb

Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən “Azərmarka” MMC tərəfindən İkinci Dünya müharibəsinin iştirakçısı, Fransa Müqavimət Hərəkatının görkəmli nümayəndələrindən biri, partizan Əhmədiyyə Cəbrayılovun anadan olmasının 100 illiyi münasibətilə poçt markası dövriyyəyə buraxılıb.

Nazirlikdən NUHÇIXAN İnformasiya Agentliyinə bildirilib ki, buraxılış bir markadan ibarət blok şəklində hazırlanıb. Blokda İkinci Dünya müharibəsi illərində nasist Almaniyası tərəfindən işğalda olan Parisin divarlarından birinə “Chargo” (Xarqo) ləqəbli Ə.Cəbrayılovun axtarışda olmasını göstərən elanı yapışdıran Vermaxt əsgəri təsvir olunub. Elanın üzərində alman dilində “10000 Reichsmark” (10000 Reyxsmarka) və “Chargo/tot oder lebendig” (Xarqo/sağ, ya ölü) sözləri yazılıb.

Markada Ə.Cəbrayılovun portreti blokun sol tərəfində, Eyfel qülləsi sağ tərəfində, divarın üzərində isə Fransa Müqavimət Hərəkatının qruplarından biri olan “Maquis”in (Maki) emblemi təsvir edilib. Markanın buraxılmasında məqsəd görkəmli partizan Ə.Cəbrayılovun yerli və əcnəbi filatelistlər, dünya kolleksiyaçıları arasında təbliğ edilməsidir.

Poçt markası ilə yanaşı, 200 ədəd Birinci gün zərfi də hazırlanaraq satışa çıxarılıb.