“Azərkosmos” sentyabrda 11 ölkəyə 522 min dollarlıq xidmət ixrac edib

Cari ilin yanvar-sentyabr aylarında “Azərkosmos” ASC tərəfindən 30 ölkəyə 30,9 milyon ABŞ dolları dəyərində xidmət (peyk telekommunikasiya xidmətləri və optik peyk xidmətləri) ixrac edilib ki, bu da ötən ilin müvafiq dövrü ilə müqayisədə 2 faiz artım deməkdir.

NUHÇIXAN İnformasiya Agentliyi İqtisadi İslahatların Təhlili və Kommunikasiya Mərkəzinin “İxrac İcmalı”nın oktyabr sayına istinadla xəbər verir ki, “Azərkosmos”un xidmət ixracından əldə etdiyi gəlir onun ümumi gəlirlərinin 89 faizini təşkil edib.

Sentyabrda ASC 11 ölkəyə 522 min dollar dəyərində xidmət ixrac edib. “Azərkosmos”un cari ilin yanvar-sentyabr aylarında xidmət ixracı həyata keçirdiyi əsas ölkələr ABŞ, Birləşmiş Krallıq, Fransa, Malayziya və Birləşmiş Ərəb Əmirlikləri olub.