Azərbaycan 2019-cu ildə avtomobil ixracına başlayacaq
2019-cu ildə Azərbaycan-İran avtomobil zavodu "Xəzər" Rusiyaya və digər MDB ölkələrinə ixraca başlamağı planlaşdırır.
NUHÇIXAN xəbər verir ki, bu sözləri "Moskva Beynəlxalq Avtomobil salonu" sərgisində zavodun sahiblərindən biri olan “AzərMaş” şirkətinin rəsmi nümayəndəsi Veronika Allahverdiyeva deyib.
Azərbaycan istehsallı "Xəzər avtomobilləri sərgidə nümayiş etdirilir.
V.Allahverdiyeva bildirib ki, sərgidə "Khazar LD" və "Khazar SD" modelləri təqdim edilir.
O qeyd edib ki, indiyədək zavodda 300-dən çox avtomobil buraxılıb: "Hazırda avtomobil ehtiyat hissələri İranda istehsal olunur, lakin gələcəkdə istehsalatı Azərbaycanda təşkil etməyi planlaşdırırıq".
Xatırladaq ki, 6 avqust 2016-cı il tarixində İranın "Iran Khodro" və Azərbaycanın "Azeurocar" şirkəti Neftçala sənaye zonasında birgə zavodun yaradılması barədə saziş imzalayıblar. Layihənin ümumi dəyəri 24 milyon manat qiymətləndirilir. Yatırımların 75 faizini Azərbaycan tərəfi, 25 faizini isə İran təmin edəcək. Zavodun illik istehsal gücü gələcəkdə 10 min avtomobil təşkil edəcək.